Abarikukoresa intaneeti omu Uganda barengire miriyooni 13.

N’ebya Omushaki waitu

Abantu abarikukoresa intaneeti omu Uganda beyongyeireho miriyooni 1 na 200,000 ahagati y’okwezi kw’okubanza, 2023 n’okwezi kw’okubanza, 2024.

Omuhandiiki w’entuura omu minisiture y’eby’amakuru na tekinologiya Dr. Amina Zawedde naagira ngu eki kireeteire omubaro gw’abantu abarikukoresa intaneeti omu Uganda kuhika miriyooni 13 na 300,000.

Okucondooza nikworeka ngu eihanga erya Democratic Republic of Congo niryo riine omubaro gw’abantu baingi abarikukoresa intaneeti omu mahanga agarikwegaitira omu mukago gwa East Africa. 

Democratic Republic of Congo eine abantu miriyooni 28 abarikukoresa intaneeti, hakurataho Kenya n’abantu miriyooni 22, Tanzania n’eya kashatu n’abantu miriyooni 21, Uganda niyo ya kana na miriyooni 13.30, Rwanda eri omu mwanya gwa kataano n’abantu miriyooni abarikukoresa intaneeti 4 kandi South Sudan eine abantu miriyooni 1 abarikukoresa intaneeti.

Dr. Zawedde naagira ngu aka n’akamanyiso akarikworeka ngu abanya-Uganda batandikire kwejumba omu kukoresa intaneeti na tekinologiya oteireho n’okumanyisana.

#WestUpdates