Omuzaani wa kiraabu ya Manchester United, Antony Matheus dos Santos.

N'ebya Andrew Tushabe

Omuzaani wa kiraabu ya Manchester United, Antony Matheus dos Santos, 23, nyomwebazyo ebiro 04/09/2023 ahandiikire ahamukura gwe ogwa Instagram agumize ngu emanja ezi bamuteireho nibamubeeherera. 

Owaabeire ari omukundwa w'omuzaani ogu, Gabriela Cavallin, omuteezi w'endongo (DJ) aharwakataano arugireyo yaagira ngu omusigazi ogu akamutuntuza yaahika n'ahakurugwamu enda ya wiiki 16.

Ogu, arikushoboorora ahamihondano ei ababiri aba bagizire, yaagambira abanyamakuru ngu Antony akabanza kumuhisyaho obuhuta ahamubiri ahakutandika kw'okwezi kwa 6 omwaka oguhwaire ogwa 2022. 

Gabriela naagira ngu Antony akaba aine eitima rya rukundo ahabw'omuntu ou Gabriela yaabeire naakoragana nawe omumyaka y'enyima. 

Ngu akaija yaamwiha ahamwanya gw'okushemerererwamu yaamuta omumotoka ye, yaamuvuga obwo arikumutiinatiinisa ku arikubaasa kumushohoza omumotoka egyo obwo eri ahanjungu y'amaani.

Nayongyeraho ngu, Antony akaba naagambisa eitima arikugira ngu Gabriela yaaba atarikwenda kuguma nawe, tihaine ondiijo ou arikubaasa kuba nawe arikwongyeraho bonshatu (n'omwana) nibaija kufa.

Ngu eizooba eryakuratsireho, Antony akoohereza obutumwa arikurabira aha WhatsApp arikuta orubanja ahari Gabriela ngu amureeteire okugamba ebigambo ebi atakugambire kandi tabaasize kumusaasira n'ahabw'ekyo areeberere omwana.

Gabriela naagira ngu ebigambo ebi bikaguma nibimutiinisa, birikumureetera ekitima kyayehuuba; na bwanyima enda ekaija yaarugamu.

Omushango ogu nigugambwa kuba gubaireho ahakutandika kw'omwaka ogu omuri Manchester obu Manchester United eba eherize kusinga Manchester City. Ngu akamuteera ekikonde kyahutaaza eibeere rye (amabeere agu barikubabyaramu kweboneza). 

Ngu na bwanyima Antony akaija yaamugira ngu yaaba akakigyendereire kumuhutaaza, tiyamuteera kikonde, kureka yaamukwatira ahakisiika kwonka.

Okutabaaza okundi nikugira ngu ebiro 08.05.2023, Antony akagyezaho kuhutaaza Gabriela n'ekirahuri bwanyima yaabo y'okutongana nikwo kumushara orukumu akamutaho ekironda. 

Gabriela naagira ngu akashaba ab'entambura kumuhwera bakamugarura Brazil, Antony atakamwitsire.

Abanyamakuru batungireho ebishushani birikworeka engaro zikomire omubyenda ebirikutangiRa okujwa kw'eshagama hamwe n'omutwe oguriho ekironda

Orwakataano oruhwaire, Gabriela ahababire omushango ahapooriisi, omuri Bungyereza kandi yaagira ngu pooriisi emurahukiizeho ekintu eki pooriisi ya Brazil etarakozire

Antony kandi hoona we naagira ngu n'amazima ngu omukukoragana na Gabriela hakabamu okutambikirana ebigambo by'akarebure kwonka yayomesereza ku atakahutaazahoga Gabriela.

Bamwe omubahandiiki by'eby'emizaano baahandiika ahamikutu yaabo ya intaneeti bagumize ngu Antony arugye aha tiimu ya Brazil ei baratware omumizaano y'okuza omumpaka z'ekikopo ky'ensi yoona barikutandika na Bolivia 

Ondiijo muhandiiki rurangaanwa naagira ngu, bwanyima ya kooki w'eihanga rya Brazil kwiha Lucas Paqueta ahakikoosi ky'abazaani ba Brazil ahabw'okujeemera ebiragiro by'omupiira arikuta sente omukuteebereza oku emipiira eraahwe, Antony nawe ashemereire kuruga ahabazaani bataahi be.

Pooriisi ya Manchester yaikiriza ku yatungire okutabaaza oku, na ku eriyo necondooza. 

Manchester United n'ekibiina ekirikukurira eby'omupiira gw'ebigyere omuri Brazil, tihaine eki baagambire ahamishango eyegyekyereirwe Antony.

#WestSports