Abaaburizeho abakazi 2 n’ab’okumara emyaka 49 omu kihome.

N’ebya Omushaki weitu

Kooti enkuru omuri Kampala ecweriire abashaija 2 abaaburizeho abakazi 2 okukomwa emyaka 49 omu kihome.

Ebihandiiko bya kooti nibyoreka ngu Shakur Kamada Mugabi na Herbert Lukwago bakozire emishango nyingi ahi baabaire nibashaba esente kuza kureekura abantu abu babaire baburizeho.

Omuramuzi wa kooti enkuru, Alex Mackay Ajiji aharwakabiri ebiro 12.11.2024 acwiiremu ngu ababiri aba nibetenga kuheebwa ekifubiro ky’amaani ahabw’ebikorwa ebibakozire ebirikutiinisa eihanga n’okuteeganisa abanyabuzaare b’abantu abu babaire babuzaho.

Aba bacweriirwe omushango ogwine akakwate n’okubuzaho omukazi omanyirwe nka Generous Charity Kyohairwe omu mwaka gwa 2018 bakagaruka bakamwita.

Ogu n’omurundi gwa kana, Kamada arikusingisibwa emishango y’obwinazi kandi we Lukwago n’omurundi gwe gwa kabiri.

Puriida waaba kitaabaarizibwa Sylivia Namawejje ashabire omuramuzi okubaheereza ekifubiro kiringaaniire arikugira ngu begarukiremu omu bwire obu bamazire bari aha rumanda beitu omuramuzi ayangire okushaba kwabo arikugira ngu omwoga gw’ab’obushoborozi omu bihome n’okureeba ngu baguma nibahabura enkozi z’ebihagaro okwegarukamu.

Orikukurira orubaju oruhababi omu mushango ogu, Irene Nakimbugwe ashabire omuramuzi okuheereza Shakur Kamada Mugabi na Herbert Lukwago ekifubiro ky’okwitwa arikugira ngu abantu nkaba bashemereire kwihirwa kimwe omu bantu.

Abahababi baretsire abajurizi 8 abajuriire omu kooti obwo barikwomesereza abarikujunaanwa.

Godwin Ahebwa, munyanya wa Kyohairwe agambiire kooti ngu bwanyima y’abainazi kubuzaho munyanya, abainazi aba bakateerera nyinabo esimu nikwo kumushaba Sh5m kuza kumurekura ngu kitari ekyo nibeija kumwita.

Abahababi nibagira ngu ababiri aba ni bamwe aha kikoosi ky’abainazi abatwire nibejumbira omu bikorwa by’okubuzaho abantu n’obwitsi, ebikorwa ebyakangire eihanga ahagati ya 2018 na 2019.

#WestUpdates