Nkihuriire ahabw’embabazi za Ruhanga- Paasita Bugingo. Courtesy Photo.

N’ebya Charles Etukuri

Paasita Aloysius Bugingo ow’ekanisa ya House of Prayer Ministry, ohonire okwitirwa omu kutaahiriirwa kw’abainazi abateire emotoka ye amasasi ahi omukumi we, Richard Muhumuza aitiirwe yaagira ngu ahabw’embabazi za Ruhanga akiraho ahuriire.

Abainazi abatakamanyirwe bataahiriire Paasita Bugingo omu kiro ekyabusheesha eriizooba Orwakashatu obu abaire naruga aha kanisa ye arikutaaha. Okutaahiirira oku kubaire omuri Namungoona, Kasubi omuri Rubaga Divijoni omu disiturikiti eya Kampala.

Omu kugambaho n’abanyamakuru omu eihangwe gw’eriizooba, Bugingo yaagira ngu nasiima Mukama okureeba ngu ahuriire. Mwebare kunshabira. 

N’eky’obusaasi kushanga ngu omukumi wangye, Richard Muhumuza aitiirwe omu kutaahiriira oku beitu nyowe mbaasize kwirukangira ah’eirwariro rya gavumenti erya Mulago ahi naatungirwa okuragurirwa,” Bugingo arikushoborora.

Yayongyeraho ngu, “omukasheeshe k’eriizooba bayoheereza abashaho kwija kundeeba kandi bayongyera kundagurira. Embeera ei ndimu terikwerarikiriza kandi Ruhanga yampereza omugisha ogundi kubaho. Mukama Ruhanga ayongyere kubarinda. Eki nakyo nitwija kukirabaho kandi tihariho muntu weena oshemeriire kubagira ngu nfiire. Ndiho mpurire.”

Aharwakashatu ebiro 03/01/2024, Pooriisi neegira ngu batandika kucondooza omu kutaahirira okwokuteeraho kwita Paasita Bugingo hamwe n’okwita omukumi we, Richard Muhumuza.

Luke Owoyesigyire, Omuhwezi w’omugambirizi wa Pooriisi ya Kampala n’emyanya egiiheriire naagira ngu ekikorwa ky’obwinazi eki kibaireho shaaha 3 z’ekiro obu Bugingo na Muhumuza babaire nibataaha.

#WestUpdates