Meeya Kakyebezi, arikugaaniiraho n'abantu omururembo rwa Mbarara ahakutongozaho omukutu gw'eby'entambura ogwa Faras omururembo Mbarara enshumi nkye ehweire. PHOTO: FELIX IKIRIZA

Meeya Kakyebezi asiimire enkora nsya ya tekinologiya omuby’entambura

N’ebya Felix Ikiriza, Mbarara City

Meeya w’orurembo rwa Mbarara, Robert Kakyebezi, asiimire enteekateeka y’omuringo gwa tekinologiya egyendereire kumaraho ebizibu by’entambura omururembo rwa Mbarara.

“Enkora egi neekyendeeza ahabizibu ebirikwizira omuby’entambura kandi turiyo nitureeta n’enkora endiijo eya Tekinologiya erikuza kuhwera omuby’okwemereza motoka omunguuto z’orurembo,” nikwo Meeya ayongeireho.

Ebi, abigambire obu, ekitogore ky’eby’engyenda ekya Faras, kibaire nikitongozaho eitaagi ryakyo omururembo Mbarara aha Independence Park.

Kuhweraho ahaby’entambura, omukutu gwa Faras ogw’eby’entambura nigubaasisa omuntu kukoragana n’omuntu wa boda boda orikurabira ahabyoma bya za kanyabwengye ninga esimu y’omuhagatiro ekirikurahusyaho empurizigana ahagati y’omushaabazi n’omuvugi wa booda.

Okurugiirira ahari Kasaija Muzafaru Hamad, omujwekyerwa wa mukuru wa Faras, omukutu ogu nigwija kuhweraho omukumaraho abainazi abarikwetaasya omumirimo y’obwa boda boda n’amamotoka g’okupangisa baine ebigyendererwa bibi.

“Waaba nookoresa Faras noyesherurira omuvugi ou orikwenda kandi abavugi aba nibaija kuba baine enamba ezihandiikirwe, zirikumanywa ekitongore kya Faras,” nikwo Muzafaru arikugira.

Jackline Kankunda, orikujwekyera mukuru w’eihanga ahabw’orurembo rwa Mbarara, kandi hoona nawe obaire ari ahakumukoro nigwo gumwe ayehanangiriize abo boona abarikuteganisa abavugi ba bodaboda ku barekyer’aho, kandi yaayongyera yaasiima Faras ahabw’entunguka ei bariyo nibareeta omururembo Mbarara.

#WestUpdates