PHOTO: Doreen Nasiima

N’ebya Doreen Nasiima

Poorisi omugomborora ya Hakibale omu disiturikiti ya Kabarole bakwataniise n’omujwkyerwa wa Purezidenti omu disiturikiti egyo (RDC) bacungwire omwishiki w’emyaka 14, orikushoma ekibiina kya 5 kuruga omumaka g’omushaija embura kareju kandi ori iba wa nyina beitu otari ishe, ahi abeire ashweirwe omukyaro kya Nkambo.

Okurugiirira ahari Festus Bandeeba, RDC wa Fort Portal, bakatunga amakuru kuruga omukitongore kimwe ekirikumanywa nka Faridah Monica Foundation Uganda ekirikushangwa omu tauni ya Kiburara nk’oku omwe ahabaishiki abu barikuha obuhwezi yaahambirwe kandi ashweirwe iba wa nyina, otari ishe, bwanyima y’okubinga nyina.

“Turikurabira omuri Faridah Kabategeki, orikukurira Faridah Monica Foundation, tubaasize kutooza amaka ga Ismail Mugume, ahi tushangire omwishiki w’emyaka 14 amushweirwe bwanyima y’okubinga nyina w’omwishiki, kandi tubaasize okumucungura,” Bindeeba nikwo atebize.

PHOTO: Doreen Nasiima

Faridah Kabategeki naaagira ngu akatunga okumanyisibwa kuruga owa nyina w’omwishiki agumize ngu omuhara omuremeise amaka n’obushwere ekyagyemesereize Faridah kutwara enshonga egi owa RDC kugira eki yaakoraho.

Richard Muhindo, orikukurira poorisi y’ahagomborora ya Hakibale naagira ngu omwishiki ogu baamuteire omumikono y’ekitongore empa-buhwezi obwo okuhiiga omubisha ogu, Ismail Mugume, kandi ori iba wa nyina, kugarukamu emishango y’okutoroboza omumbuga z’ebiragiro.

Ebi abatuura barikugamba

Justine Katusabe, omushomesa ahari Kiburara Primary School orubanja naaruta ahangyendo naingwa ezi abeegi baikutambura kuruga omubyaro barikusherura obwegyese obw’omutindo ekirikureetera abeegi baabugana ebizibu barikuza ah’ishomero na baaba nibarugayo.

“Abaana b’abaishiki abo nibakyema baaba nibaza ah’eishomero na baaba nibarugayo na munonga abavugi ba Boda Boda hamwe n’abasigazi abarikukora omumaka g’abantu,” nikwo Katusabe arikushoboorora.

Clovice Kateeba, Ishe wa Ismail Mugume, ashabire abapoorisi kugirira omutabani embabazi ahabw’okugira ngu akatandika kukoresa ebitokooza-bwongo ekireeteire emiteekateekyere ye yaaruga omumbeera.

“Ninshagika poorisi okukwata mutabani wangye ahabw’okugira ngu ebitokooza-bwongo bikamureetera enteekateeka etarimu magyezi obundi omutwe gukaagarukamu amagyezi byaaba ari okwo,” nikwo Kateeba arikugira.

Abeegi okuruga omumashomero kuza omubushwere bakiri abaana kandi amagomborora agebembeire omumuze ogu ni Hakibale, Kicwamba, Karangura na Magusu.