Uganda nefeerwa obutabarwa 10 buri mwaka – Mbarara

Uganda nefeerwa obutabarwa 10 buri mwaka – Mbarara

N’ebya Eli Akiiza

Obushomankuzi omu Uganda, okucondooza nikworeka ngu Uganda nefeerwa obutabarwa (trillion) 10 buri mwaka.

Okucoondooza kuruga omu kitongore ekya kariisho-riisho wa gavumenti nikworeka ngu buri mwaka, Uganda nefeerwa sente zirikurenga trillion 10 omu bushomankuzi kandi eki kiteganiise entunguuka y’eihanga.

Eki kigyemeseriize abakuru omu kitongore eki kutandiika okuza omu mashomero hamwe n’amatendekyero g’aheiguru kujanjaaza omuranga gw’okurwanisa obushomankuzi kutandikira omu nsinga nto.

Bamwe ahabeegi ababangurwa

Bwanyima y’ekitongore kya Kariisho-riisho wa Gavumenti kucondooza kikashanga ngu eihanga nirifeerwa sente zirikurenga trillion 10 buri mwaka, obwahati batandikire ehururu y’okubangura abeegi omu mashomero hamwe n’amatendekyero g’aheiguru n’ekigyendererwa kugunjuura abeebembezi barungi ba nyentsya.

Eizooba eri, abakuru kuruga omu kitongore eki bebembiirwe Anne Muhiirwe Twinomugisha baagiraho ekigaaniiro ky’omutaano n’abeegi ba Burengyerwa eizooba ahari Bishop Stuart University.

Bishop Sheldon Mwesigye n'omuhwezi wa IGG

Okukura bari ab’obujunaanizibwa, okuhweera bangyezi baabo hamwe n’okutandikaho ebibiina by’okurwanisa obushomankuzi omu mashomero gaabo nizo zaaba ziri enshonga nkuru omu kigaaniiro eki.
Okurugiirira ahari Anne Muhiirwe Twinomugisha, Omuhweezi wa Kariisho-riisho wa gavumenti, ekigyendererwa kyaabo ky’okutandikira omu mashomero ehururu y’okurwanisa obushomankuzi n’okwenda ngu Uganda ebe eihanga rirungi.

Ekigaaniiro eki kyahikwamu abeebembezi b’abeegi b’amashomero ga siniya hamwe n’amatendekyero g’ahaiguru kuruga omu kyanga kya Ankole. 

Kandi okurugiirira aha bakuru omu kitongore eki, ebigaaniiro ebi n’eby’okwetoroora eihanga ryoona.

#WestUpdates