Blessings Jackson Ndugwa, omwe aha baine obuzibu bw’okushohoreza aha nda owamara ameezi 10 n'obuzibu obu. Photos by Christopher Ahimbsibwe.

N’ebya Christopher Ahimbisibwe

MBARARA

Omubaro gw’abantu abarikuteganisibwa endwara zitari zimwe ezirikubareetera babashemeza, kikareetera omuntu yaatandiika kushohereza omu kapiira nainga aha nda ekirikumanywa nka Ostomy nigweyogyera. 

Okucondooza okukozirwe ekitongore ekya Ostomy Association of Uganda nikyoreka oku abantu barikurenga 730 omu Uganda barikutura n’obuzibu bw’okushohoreza aha nda  bwanyima y’okushemezibwa. 

Ebi bigambirwe Alex Mushabe- mukuru w’ekitongore eki nagira ngu omu kucondooza kwabo, bashangire ngu abantu baingi abaine oburemezi obu tibaine by’okukoresa kandi abaingi nibakoresa obivera ekirikuta amagara gaabo omu kabi nangwa na bamwe barahuka kufa.

Blessings Jackson Ndugwa, omwe aha baine obuzibu bw’okushohoreza aha nda nagira ngu bwanyima y’okushemezibwa emirundi erikurenga omuri 2, nagira ngu akatandika arikushaasha omunda hamwe n’okuteerwa omutwe burizooba kuruga omu mwaka gwa 2007 kwonka tiyabifaho.

N’obu abazaire ba Ndugwa bagyerizeho kumuraguriza omutwe kumara emyaka nka 10 atarikumanya ekirikureeta obuzibu obu, kikamureetera yaasisikara omunda ekyamurugirireho okumushemeza. 

Ndugwa nagira nguyahisya omwaka ashemezibwe kandi arikushohoreza aha nda ekintu eki arikugira ngu nikyenda obuhwezi bw’amaani hamwe n’endeberera erikumara ahabw’okuba ahi orikuba noshohoreza wahareberera kubi nihajunda.

Obwa hati ekitongore ekya Ostomy Association of Uganda, kikwatanise n’ekitongore ekya International Ostomy Association barugireyo kuhwera abanya-Uganda abaine obuzibu bw’okushohoreza aha nda. 

Jon Thrkelsson, Purezidenti wa International Ostomy Association (Bumosho), Alex Mushabe- mukuru wa Astomy Association of Uganda (Rwagati) n'omukazi we omu mushomo ogubaire aha Lake View Hotel, Mbarara.

Alex Mushabe- mukuru wa Uganda Ostomy Association nagira ngu barugireyo kuhwera abo boona abarikushohoreza aha nda barikubaheereza obupiira bw’omurembe obw’okushohorezamu oburikumanywa nka (ostomy bags) n’ekigyendererwa ky’okubatambira obusaasi n’okureeba ngu baguma bari abayonjo. 

Ostomy bag emwe eri ahagti ya shiringi 10,000- 35,000 shillings kandi nekoresibwa kumara ebiro 2-3 byonka.

Omu aha bakuru kuruga omu kitongore ekya International Ostomy Association arikworeka abantu oku baine kukoresamu obupiira bw'okushohorezamu (Ostomy bags) omu mushomo ogubaire ahari Lake View hotel, Mbarara.

Jon Thrkelsson, Purezidenti wa International Ostomy Association nashaba gavumenti okutaho enteebekanisa z’okushagika abantu abarikuba bashemeziibwe bakatandika kushohoreza aha nda. 

Nayongyeraho ngu omuntu orikushohoreza aha nda aine obugabe bw’okukora emirimo endaijo nk’abandi kutari kumushorora omu bandi nk’omuntu otaine mugasho.

Ahabw’okwenda kukyendeza omubaro gw’abantu abarikubonabona n’obuzibu obu, ekitongore ekya Ostomy Association of Uganda kitandikire kutendeka abashaho hamwe n’abantu abaine oburemezi obu omu kyanga ekya Burengyerwa-Izooba omushomo ogubaire aha Lake View Hotel, Mbarara n’ekigyendererwa ky’okuhwera abo abaine obuzibu obu. 

#WestUpdates