Abany'ishengyero ab'aha kakiiko ka Paramenti ahanshonga za Purezidenti barikurambura enkyerere ezihingirwe kushagika fakitore ya Silk eya Rubaare omu disiturikiti eya Sheema. Photos by Bruno Mugizi.

N’ebya Bruno Mugizi

SHEEMA

Abany’ishengyero ab’aha kakiiko ka paramenti ak’enshonga za Purezidenti bataayaayiire fakitore ya Silk eya Rubaare Sericulture production omuri Rubaare omu woodi ya Nyarwenshama omuri Sheema Central Divijoni omuri Sheema Munisiparite kureeba ahabw’enki etarikushohoza ebintu ebikozirwe omu Silk.

Abany’ishengyero aba babaire beebembiirwe mukuru w’akakiiko aka kandi Omuny’ishengyero-kazi wa Adjumani, Jessica Ababiku.

Omu mwaka gwa 2017, disiturikiti eya Sheema ekata omukono ahandagano n’akakiiko aka Uganda National Council of science and technology (UNCST) kupangisa hiika 26 z’eitaka rya disiturikiti kumara emyaka 10 kubaasa kukoreraho ebintu bya Silk hamwe n’okuhinga ekyerere beitu kuruga obwo, etwire etarikukora ahabw’okubura obushagiki burikumara kuruga omu gavumenti.

Omusiri gw'enkyerere omuri Rubaare, Sheema disiturikiti.

Nikigambwa ngu minisiture y’ebya saayansi tekinologiya omu mwaka gw’eby’esente oguhwaire ekemereza shiringi biriyooni 40 ezabaire zishabirwe ekitongore ekya Tropical Institute of Development Innovations (TRIDI) kubaasa kushagika purogyekiti egi eya Silk.

Omu rutaayaayo rwabo, abany’ishengyero bakyorekire ngu fakitore egi etwire etarikukora kumara haihi emyaka 2 kandi abakozi batwire batarikushashurwa kumara ameezi 5.

Abakuru kuruga omu kakiiko ka Paramenti ak'enshonga za Purezidenti barikuganiira n'abeebembezi ba disiturikiti eya Sheema aha nshonga ya purogyekiti eya Silk.

Jessica Ababiku ashabire abeebembezi ba disiturikiti okushoborora ahabw’enki fakitore egi etwire etarikukora kandi obwo gavumenti yagitiiremu esente nyingi omu purogyekiti ya Silk.

Jemimah Buhanda, Mukuru w’entebe ya kataano ahabwa Sheema agambire ab’akakiiko ngu bwanyima y’okuta omukono ahandagaano na kampuni endiijo eya Tropical Institute of Development Innovations (TRIDI), erikukurirwa Dr. Clet Wandui Matsiga, bakaheebwa konturakiri kuruga omu kakiiko aka Uganda National Council of Science and Technology (UNCST) kutandika kukora Silk n’ebindi ebirikurugamu beitu tibaragumizemu bwanyima y’okugura ebyoma ebyabaire bikuzire bitarikubaasa kukoresibwa omu kukora ebintu.

Steven Kangwangye, Omuny’ishengyero w’eishaza erya Bukanga atangiire munonga nk’oku ebyoma ebi bitwire aheeru ya fakitore bitarikukoresibwa birikuteerwa enjura n’omushana.

Abany'ishengyero ab'aha kakiiko ka Paramenti ak'enshonga za Purezidenti barikubuganaho abeebembezi ba disiturikiti eya Sheema kuganiira ahari purogyekiti eya Silk eya Rubaare omuri Sheema.

" Obu n’obushomankuzi bw’enyini. Nobaasa ota kureeka ebyoma ebi aheeru ya fakitore birikuteerwa omushana n’enjura kandi gavumenti yabiteiremu esente nyingi,” Kangywangye arikushoborora.

Akakiiko karaganiise kukora rupoota kugyanjura omu Paramenti aha bibashangire aha fakitore ya Silk n’ekishemeriire kukorwa.

#WestUpdates