Nandutu okutandika kwehozaho omu mushango gw’amabaati eriizooba

N’ebya Omushaki Waitu,

Kampala:

Owabaireho Minisita w’eihanga ow’enshonga za Karamoja, Agnes Nandutu, orikujunaanwa okukozesa kubi amabaati g’abantu ba Karamoja naija kutandika kwehozaho eriizooba, 3.7.2025.

Eki nikijaho bwanyima yesande ishatu eirwariro erya Mulago National Referral kuhamya ngu aine amaani marungi kutandika kwehozaho omu mushango gw’amabaati.

Okukyeberwa kw’eirwariro kweizireho bwanyima ya Anti-Corruption Division omu Kooti enkuru kushaba okushwijuma bwanyima ya Nandutu kugira ngu tarikubaasa kwehozaho ahabw’obutagira amagara marungi.

Okushutama kwa kooti nikwija kuba kukuriirwe Omuramuzi Jane Okuo Kajuga.

Nandutu hoona ori omuny’eishengyerokazi wa disiturikiti ya Bududa najunaanwa okukozesa kubi ebintu bya Gavumenti kandi yaheeza kusingisibwa omushango ogu, abaasa kukomwa emyaka 7 omu kihome.

Orubaju oruhababi nirugira ngu ahagati y’Okwamukaaga kuza omukwamushanju 2022 aha ofiisi y’enganzi y’eihanga omuri Namanve, akakiira amabaati 2,000 ga Gavumenti agabaire gari agabantu b’ekyanga ekya Karamoja omubushobobo.

#WestUpdates