Kwarija Nicholas, omuhangu omu kigombe ekya Young Innovators arikwakiira abany'ishengyero b'aha kakiiko ka Paramenti ak'ebya sayaansi na tekinologiya ababaire bari omuri Sheema. Photos by Bruno Mugizi

N’ebya Bruno Mugizi. 

SHEEMA 

Abany’ishengyero abari aha kakiiko ka Paramenti ak’ebya Sayaansi na tekinologiya basiimire eminyeeto y’omuri Sheema ei gavumenti yahaire esente eine eki ebaasize kukoraho.

Gavimenti kurabira omu minisiture y’ebya sayaansi na tekilogiya omu bwire bwa COVID-19 ekaheereza eminyeeto y’omu disiturikiti ya Sheema esente z’okukora sanitizers kubaasa kwongyera omutindo omu bintu byabo.

Abany’ishengyero ababaire beebembiirwe ceeyamaani w’akakiiko aka, Remigio Achia kandi omuny’ishengyero w’eishaza erya Pian babaire bizire kureeba oku esente ezahairwe eminyeeto egi zaakoresiibwemu.

Omu mwaka gwa 2020, gavumenti ekaheereza eminyeeto y’omuri Sheema shiringi miriyooni 315 kutandikaho fakitore y’okukora sanitizer beitu bagumizemu batandika n’okukora eshande ‘Wine” ei barikweta eya Canaan Wines. 

Eshande ei eminyeeto ya Sheema erikukora bwanyima y'okuheebwa esente kuruga omu gavumenti.

Barikurambura fakitore egi nyomwebazyo omu tauni ya Kabwohe omuri Sheema Munisiparite, Muhesi Jenipher- Omuny’ishengyero-kzi wa Kazo n’abandi bany’ishengyero bashemeriirwe ahabw’omurimo oguriyo nigukorwa eminyeeto n’okukoresa gye esente ezabahairwe bakahika naha kukoramu eshande bwanyima y’okureeba ngu sanitizer hati teine katare nk’oku COVID-19 yagyenzire nekyendera omu eihanga.

Syrus Arinaitwe, Orikukurira ebya production omu kigombe ky’eminyeeto egi nakyoreka ngu bakacwamu kutandika kukora eshande ahabw’okubura akatare ka sanitizer. Naagira ngu eki kibahwerire kwongyera omutindo omu bintu by’omu kicweka eki na munonga ebitookye.

Syrus Arinaitwe, Orikukurira ebya production omu kigombe ky’eminyeeto ekya Young Innovators arikushoborora abany'ishengyero b'aha kakiiko ak'ebya sayaansi ababaire bataayaayire fakitore yaabo ey'okukora eshande ya Canaan.

Ebyo bikiri aho, Kwarija Nicholas, omuhangu omu kigombe ekya Young Innovators naagira ngu babaasize kushohoza ecupa 40 z’eshande kuruga omu kitookye kimwe kandi buri cupa y’eshande nibagiguza shiringi 10,000.

Kwarije Nicholas, Omuhangu omu kigombe ky'eminyeeto ekya Young innovators arikwakiira abany'ishengyero b'aha kakiiko k'ebya sayaansi.

Obwahati nibashaba gavumenti okubongyera esente bakabaasa kuhangusya fakitore yaabo.

#WestUpdates