Siipika wa Paramenti, Anita Among hamwe n'omukundwa we, Moses Magogo.

N’ebya Umaru Kashaka
    
Abeebembezi n’abanyabutegyeki nibakyeyongyera kuhayo obutumwa bw’okutaabarusya Siipika wa Paramenti hamwe n’omushaija we, Moses Magogo ahabw’okuzaara abarongo.

Siipika wa Paramenti, Anita Among hamwe n’omuny’ishengyero wa Budiope East, Moses Magogo bazaire abarongo aharw’okubanza.

Enganzi y’eihanga, Robinah Nabbanja asiimire omuhwezi wa Paramenti, Thomas Tayebwa ahabw’okurangiirira amakuru ga Among na Magogo ag’okuzaara abarongo.

“Yebare kandi munyikirize nyegaite aha banya-Uganda boona kutaabarusya murumuna wangye, Rt. Hon Siipika Nalongo Anita Among kandi nimusiima ahabw’okuheereza mwijukuru wangye Hon. Magogo eiziina ry’amaani erya Ssalongo. Mutaabarukye kandi Ruhanga abaheereze omugisha n’abaana banyu,” Nabbanja arikurabira aha mukura gwe gwa X.

Owabaireho enganzi y’eihanga, Amama Mbabazi nawe agiire aha mukura gwe gwa X kutaabarusya Among na Magogo ahabw’okuzaara abarongo.

Katikiro wa Buganda, Charles Peter Mayiga nawe arikurabira aha mukura gwe gwa X ayegaitsire ahari Siipika Among na Magogo kushemerwa nabo ahabw’ekiconco ky’abarongo baabo b’aboojo.

#WestUpdates