Abany'ishengyero Naome Kibaaju (Sheema North), Rosemary Nyakikongoro ( Woman MP Sheema), Chairperson wa Sheema Jemimah Buhanda n'abandi barikutongozaho amaizi omuri Sheema. PHOTOs: Bruno Mugizi.

N’ebya Bruno Mugizi

SHEEMA

Abebembezi omu disiturikiti ya Sheema baigwireho amaizi g’amashomero ga Nshongi Primary School hamwe na Kigarama Seed Secondary school omu gomborora eya Kigarama hamwe n'ag’eirwariro rya Muzira heath centre III erikushangwa omuri Kyangyenyi omu disiturikiti eya Sheema.

Omukoro ogu gubaire gwebembirwe omunyishengyero ahabwa Sheema North, Naome Kibaaju.

Amaizi aga gakozire ekitongore kya  gavumenti ekya 'Umbrella' ekirikujunanizibwa okujanjaja amaizi omubyaro hamwe nobutauni obukye omwihanga.

Arikugambira aha mukoro gw’okwiguraho amaizi aga, Kibaaju ayorekire okukwatwaho nk’oku abashomesa bahugire omu kushomesa abeegi abyaharubaho beitu bakaremwa kubegyesa okugamba orujungu.

Agizire ngu abaana abaingi nibakira kuremwa ‘interviews’ aha mirimo ei barikuba bashabire ahabw’okuremwa kweshobororaho omu rujungu nikwo kushaba abashomesa aba kuta amaani aha kushomesa abaana okugamba orujungu.

Aha mukoro ogu, Omuny’ishengyero-kazi ahabwa Sheema, Rosemary Nyakikongoro asiimire ab’ekitongore ekya Umbrella ahabw’okuteekateeka aha bantu ba buraijo omu byaro kandi nashaba abatuura kutiimba ahabw’okwenda ngu batungye amaizi marungi. 

Omuny'sihengyero-kazi ahabwa Sheema, Rosemary Nyakikongoro aha mukoro gw'okutongoza amaizi omuri Sheema.

Mirembe Peace Bongonzya- Mukuru w'eishomero erya Kigarama seed secondary school asiimire gavumenti ahabw’okutaho eishomero arikugira ngu niryija kuhwera abeegi kutunga obwegyese oburi aha mutindo.

#WestUpdates