Omuhwezi wa Sipiika wa Paramenti, Thomas Tayebwa arikuta ekimuri ahashanduukye erimu omubiri gwa Obadiah Ntebekaine Rushambuza aha kanisa ya All Saints Church, Nakasero Orwakashatu ebiro 06.11.2024.

N’ebya Omushaki weitu

NAKASERO

Abany’ishengyero abaingi kuruga omu kyanga ekya Burengyerwa-Izooba bwa Uganda hamwe n’ekanisa ya Uganda binamiire Omushuubuzi ruranganwa Obadiah Ntebekaine Rushambuza ofiire 01.11.2024 ah’eirwariro erya Aga Khan omuri Nairobi.

Okurugiirira aha ba famire y’omugyenzi, Rushambuza owazairwe omu mwaka gwa 1952 aitsirwe endwara y’okushanyarara omubiri (Stroke). Obadiah Rushambuza namanywa munonga ahabwa bizinesi ze ezi abaire nakora omu eihanga.

Photos by Simon Peter Tumwine.

Arikugambira abantu abahikire aha kushabira omubiri gw’omugyenzi Rushambuza aha kanisa ya All Saints Cathedral, Nakasero Orwakashatu ebiro 06.11.2924, Omuhwezi wa Sipiika wa Paramenti, Thomas Tayebwa agambire ahari Rushambuza nk’omwe aha bantu abakozire kihango ahabw’entunguuka y’eihanga arikwongyeraho ngu Rushambuza atwire ari empagi y’amaani ahabwa purogyekiti zitari zimwe ez’entunguuka.

Omuhwezi wa Sipiika wa Paramenti, Thomas Tayebwa arikuramusya Naome Kibaaju, omukazi w'omugyenzi Obadiah Rushambuza aha kushabira omubiri gwe omu kanisa ya All Saints Church, Nakasero.

Tayebwa ayongiire yagamba ahari Rushambuza nk’omwe aha bantu abaretsireho entunguuka y’amaani omu kyanga ekya Bushenyi empango arikwongyeraho ngu Rushambuza akakoresa ebintu ebi Ruhanga yamuhaire kutunguura Bushenyi.

“Rushambuza afiire kwonka ekitwine kukora n’okugumyaho eiziina n’ekitiinisa kye ebi asigire. Asigire abaana n’abaijukuru abashemereire kugumyaho ekitiniisa n’eiziina rye. Rushambuza akozire ebintu bingi omu byanga ebihweriire munonga abantu kwetunguura. Atwire ari empagi y’amaani ah’eihanga,” Tayebwa arikugamba aha mugyenzi Rushambuza.

Omu bigambo bye, Biishopu w’obureeberezi bwa West Ankole owahumwire, Yonah Mwesigwa Katonene nakyoreka ngu ekanisa efeereirwe empagi y’amaani arikwongyera ngu Rushambuza asigire eiziina n’ekitiinisa ahabw’ebintu ebi yakozire.

Abanyadiini barikuta ekimuri ahashanduukye erimu omubiri gwa Obadiah Rushambuza n'okumusibura aha kanisa ya All Saints Church, Nakasero omuri Kampala.

Omu butumwa bwe obw’okusaasira obumushomiirwe Biishopu wa Kampala, Hannington Mutebi, Aakiibishopu w’ekanisa ya Uganda, Dr. Stephen Kaziimba Mugalu naagira ngu Obadiah Rushambuza aheereize Ruhanga ahamwanya ogu abaire nakoreraho, omumaka gye, famire ye n’omuri banywani be.

Mutebi nakyoreka ngu abaikiriza boona nibajurira ngu Rushambuza akakora omwoga muhango omu kushagika purogyekiti z’ekanisa.

Naome Kibaaju, Omukazi w’omugyenzi kandi ori n’omuny’ishengyero wa Sheema North omu disiturikiti ya Sheema agambire aha mushaija we Obadiah nk’obaire nakunda abantu arikwongyeraho ngu obu ekanisa ensya eya All Saints Church etongozibwaho, niryo eizooba eri omushaija we afeereireho.

Omukazi w'omugyenzi Obadiah, Naome Kibaaju n'aba famire barikuta ekimuri ahashanduukye erimu omutumbi gwa Obadiah ahakanisa ya All Saints Church, Nakasero Orwakashatu ebiro 06.11.2024.

Hariho okushabira omubiri gwa Obadiah Rushambuza eriizooba Orwakana ebiro 07.11.2024 aha kanisa ya Nyakabirizi omuri Bushenyi-Ishaka Munisiparite omu disiturikiti eya Bushenyi.

Omuny'ishengyero wa Sheema North, Naome Kibaaju n'abaana be arikugamba aha mushaija we omugyenzi Obadiah Ntebekaine Rushambuza aha kushabira omubiri gwe aha kanisa ya All Saints Church, Nakasero Orwakashatu ebiro 06.11.2024.

Obadia Rushambuza naija kuziikwa Orwakataano ebiro 08.11.2024 omu maka gye omuri Nyakabirizi omu disiturikiti eya Bushenyi.

#WestUpdates