Kagame, atwire ari Purezidenti wa Rwanda kuruga omu mwaka gwa 2000 ariyo nayesimbaho encuro ye ya kana ahantebe y'obwa Purezidenti.

N’ebya AFP

KIGALI – Purezidenti w’eihanga erya Rwanda, Paul Kagame naija kuhayana n’abandi bantu babiri omu karuuru ka boona akarikwija kuteerwa okwezi okurikwija, Okurugiirira aha rukaraara rwabetsimbireho orwahikireho.

Orikukurira akakiiko k’eby’oburuuru ak’eihanga rya Rwanda, Oda Gasinzigwa agambire abarikwenda kwesimba nka; Paul Kagame, Frank Habineza ow’ekigombe ekya Democratic Green Party hamwe n’otaine kigombe ( Independent), Philippe Mpayimana. Akaruuru aka nikeija kuteerwa ebiro 15.07.2024.

Habineza na Mpayimana nabwo nibo bayikiriziibwe bonka kwesimba ahari Kagame omu karuuru ka boona akateirwe omu mwaka gwa 2017.

Gasinzigwa naagira ngu baatungire okushaba kw’abantu 9 abarikushaba kwesimba omu karuuru aka.

Omuntu w’ekitiinisa otari aha rukaarara rw’abahikireho kwesimba ni; Diane Rwigara, omwebembezi w’ekigombe ekya People Salvation Movement owazibiirwe kwesimba omu karuuru ka 2017.

Rwigara akazibirwa kwesimba omu mwaka gwa 2017 ahabw’okugambwa kuba yacumpwire emikono y’abashagiki be aha bihandiiko bye.

Rwigara, 42, akakwatwa, yateebwaho omushango gw’okucupura kandi akakomwa omwaka gurengire omuri gumwe omu kihome. Akaija yarekurwa omu mwaka gwa 2018.

Kagame, otwire ari Purezidenti wa Rwanda kuruga omu mwaka gwa 2,000 ariyo nayesimbaho encuro ye ya kana ahantebe niyo emwe ey'obwa Purezidenti.

#WestUpdates