Embuga za National Unity Platform School of Leadership ahi oruteerane rw'abajwekyerwa rwakorerwa. PHOTO: ISAAC NUWAGABA

N’ebya Isaac Nuwagaba

Ekibiina ky’eby’obutegyeki eky’orubaju oruhakani ekya National Unity Platform kyagiraho oruteerane rw’abajwekyerwa orutaikirizibwamu bantu baingi orw’omurundi gwa kashatu eriizooba ebiro 11.06.2025.

Oru rwabaho ah’itendekyero ry’eby’obwebembezi ry’ekibiina eki omuri Kampala. Abajwekyerwa barikuhika 127 nibo baayetwa kuza omuruteerane oru kugorora enshonga eziribaire niziteganisa ekibiina kuruga kitandika.

Kurugiirira ahari bamwe abaaba bari omuruteerane oru, enshonga emwe omuzagambwaho ni bamwe omubatandikireho ekibiina eki beitu bakaija bakakoraho ebibiina ebindi ebirikuhakanisa National Unity Platform.

Enshumi nkye ehweire, orikujwekyera eishaza erya Nyendo-Mukungwe kandi owayebembeireho orubaju oruhakani omu ishengyero, Mathias Mpuuga akarangirira ku arugire omu NUP nikwo kukoraho ekibiina ekya Democratic Alliance ahi ari omushugaanisa aharurengo rw’eihanga.

Okurugiirira ahamujwekyerwa omwe omu ishengyero kandi otaayenda kugambwa amaziina, enshonga ya MP wa Busiro East, Medard Ssegona, nayo yaagambwaho bwanyima y’okurangirira ku arikwenda entebe ya mukuru w’ekibiina eki ei Robert Kyagulanyi orikukira kumanywa nka Bobi Wine.

Kuruga ahamuntu ondiijo ou TV West egambireho nawe omumwabazyo gwa nyomwabazyo, okuteerera abajwekyerwa b’ekibiina akaruuru kubaire nikugyenda omumaisho ahantebe ezirikuteererwa akaruuru ak’ebendera ya NUP.

Nikigambwa ngu emyanya emwe ezibiirwe kwesimbwaho nikwo kugirekyera abantu abaatandikireho ekibiina eki nikwo kugireka etaaine kihakanisa.

Ahi twatungira amakuru g’eriizooba, ekibiina kyaba kitakagambeire eihanga ahabyabaho eriizooba.

#WestUpdates