Gen. Muhoozi Kainerugaba, Mukuru w'amahe g'eihanga arangiriire ku atarikuza kwesimba ahabwa Purezidenti omu karuuru ka 2026.

N’ebya Omushaki weitu

Ekigombe ekiri omu bwebembezi ekya NRM nikisiima Gen. Muhoozi Kainerugaba ahabw’okwimukira Purezidenti Yoweri Museveni ahantebe y’obwa Purezidenti omu karuuru ka boona aka 2026.

Omuhandiiki mukuru w’ekigombe ekya NRM, Richard Todwong agambiire Radio West ngu Gen. Muhoozi, ori mukuru w’amahe g’eihanga akozire encwamu nungi kandi y’obwengye.

"Ninyenda kusiima Gen. Muhoozi nyihire aha mutima ahabw’encwamu ei akozire kandi nashaba abashagiki be boona okurugayo bakashagika Purezidenti Yoweri Museveni omu karuuru ka 2026. Encwamu egi ebaire eri nungi kandi y’obwengye,” Todwong arikusiima.

Todwong naagira ngu aine amatsiko mingi ngu abashagiki ba Gen. Muhoozi nibeija kukora eki abahabwire.

Todwong, owabaireho Omuny’ishengyero kandi minisita naagira ngu NRM eteireho entuura nungi y’eby’obutegyeki kandi hati nagikiririzamu,“ eki Muhoozi akozire nikishoborora gye eki abantu batwire nibagambaho yaaba arikuza kwesimba.

Aharwamukaaga ebiro 21.09.2024, Gen. Muhoozi nabwo ori omuhabuzi mukuru wa Purezidenti aha mirimo y’omutaano arangiriire ku atarikuza kwesimba omu karuuru k’okutoorana Purezidenti 2026.

Muhoozi arangiriire ngu atarikwija kuba ari aha kakongi k’akaruuru 2026. Ruhanga wangye agambiire kubanza kuta amaani aha kukorera amahe. Nahabw’ekyo, Ninyenda kuhinguza Purezidenti Yoweri Museveni omu karuuru ka 2026, Muhoozi arikushoborora kurabira aha mukura gwe gwa X.

Agumiizemu yashaba abashagiki be boona hamwe n’abamemba b’ekigombe ekya Patriotic League of Uganda (PLU), eki arikukurira nka ceeyamaani okukuratira obuhabuzi bwe bakashagika Purezidenti Museveni.

#WestUpdates