Omugyenzi amanyirwe nka; Shallot Turyahabwe, 26, omutuura wa Nyabubaare I omuri  Isingiro woodi omu tauni kanso ya Bugongi omu disiturikiti ya Sheema. Photo by Bruno Mugizi.

N’ebya Bruno Mugizi

SHEEMA

Omwishiki w’emyaka 26 aitsirwe omu tauni ya Kabwohe omu disiturikiti ya Sheema aitsirwe bwanyima y’abainazi kubanza bamuhamba. 

Ekikorwa ky’obwinazi eki kibaireho nyomwebazyo ebiro 22/04/2024 omu kyaro ekya Market Cell omuri Kabwohe divijoni omu Munisiparite ya Sheema.

Omugyenzi amanyirwe nka; Shallot Turyahabwe, 26, omutuura wa Nyabubaare I omuri 
Isingiro woodi omu tauni kanso ya Bugongi omu disiturikiti ya Sheema. Omugyenzi abaire nakora omu hoteeri emwe omu tauni ya Kabwohe.

Paul Muhenda, Orikukurira okucondooza emishango aha Pooriisi ya Sheema agambire omunyamakuru weitu ngu Shallot Turyahabwe aheererukire kureebwa ari omu baara emwe omu tauni ya Kabwohe shaaha nka 8 z’ekiro aine abandi bantu babiri abatamanyirwe. 

Aizire yashangwa aitsirwe bwanyima y’okugambwa kuba abandize yahambwa abainazi abatakamanyirwe. 

Muhenda ashabire bakama b’ebyombeko okutaho amataara g’eby’okwerinda ahabyombeko byabo. 

Nabwo, ashabire abantu okuza ahabuzoora maisho bakabaasa kwerinda na munonga abakazi n’abaishiki omu bwire bw’eekiro kandi berinde okutaburira omu mwirima n’okunywa amaarwa mingi.

Ssenyonga Muhhamad, Ceeyamaani w’ekyaro ekya Market Cell nashaba abatuura obutoosha kuguma nibahayo omu ofiisi ye nainga aha Pooriisi abantu abu barikuteekateekaho kuba enkozi z’ebihagaro kwenda ngu babaase kucondozibwaho.

Omutumbi gw’omugyenzi gutwirwe omu kabafu ah’eirwariro erya Kabwohe Health Centre IV kukyeberwa obwo okucondooza omunshonga egi kurikugyenda omu maisho.

#WestUpdates