Dr. Rachael Beyagira arikugamba ahamushomo enshumi nkye ehweire ahari Las Vegas Hotel omururembo Mbarara. PHOTO: ABDULKARIM SSENGENDO

N’ebya Ssengendo Abdulkarim

Ab’ekitongore ky’eby’amagara bahaireyo okurabura ahakutwara kwenda omubaishiki batakahikize myaka omu ihanga kandi baahiga n’abeebembezi boona ab’ekyanga kya Ankore n’ebindi bicweka omu ihanga kwijaho n’enkora z’amaani kurwanisa omuze ogu.

Omwete ogu gukozirwe Dr. Rachael Beyagira, obwa hati orikukora nka kamiishana omurubaju orw’abaana n’amashomero omukitongore eky’eby’amagara. Beyagira ebi abigambeire ahamushomo ogutebeekanisiibwe eitendekyero erya Mbarara University of Science and Technology, orubaju rw’abeereere n’eby’amagara g’abaana.

Omushomo ogu gubaire guri ogw’okworeka ebikozirwe omunkora y’eby’amagara g’abaana n’abo abaakura eyateirwe omu disiturikiti ezirimu Bushenyi, Rubirizi na Ntungamo.

Purogyekiti egi erikushagikwa aba Global Affairs Canada (CAC) kuhisya omuri miriyooni 3 n’ekicweka za doora eza Canada ekatongozibwaho emyaka 4 ehweire.

Bamwe ahababeire bari ahamushomo ahari Las Vegas Hotel omururembo Mbarara enshumi nkye ehweire. PHOTO: Abdulkarim Ssengendo

Abarikukwatwaho ababeire bari ahamushomo ogu ogubaireho aha hoteeri ya Las Vegas omururembo Mbarara babeire barimu abeebembezi ba disiturikiti, ebitongore ebitari bya Gavumenti, ekitongore ky’eby’amagara, amatendekyero g’eby’obwegyese hamwe n’abajwekyerwa kuruga Canada, Tanzania, Kenya na Malawi.

Omu ripoota ye, Dokita Beyagira agizire ngu abanya Uganda bakyendeerize ahamubaro gw’abaana abarikufeera ahansi y’emyaka 5 ogw’abaana abarikufa nibazaarwa n’abakazi abarikufa nibazaara kwonka kandi ngu okukwatwa akakooko ka siriimu omubaana abato ab’emyaka y’ahaiguru kukiri ahaiguru, agumize ngu omuringo gw’okugaita ebitongore bitari bimwe na bimwe kukoresa amaani ageeteeraine nigwo gushemereire kukoresibwa kurwanisa ekizibu eki.

Bamwe omub'ekitongore ky'eby'amagara n'abajwekyerwa kuruga Tanzania, Malawi na Canada bari omuri Bushenyi ahi purogyekiti y'okuhwera eminyeto mito ahakizibu omuby'amagara. PHOTO: Abdulkarim Ssengendo

Ogu agizire ngu eihanga ritwire ahakizibu ky’amaani ahabw’okuba okutwara enda omubaishiki bato kigumire kiri ekizibu ky’eihanga kumara obwire bwingi obwo okucondooza kurikworeka ku okutwara enda omubaishiki bato kuremeire ahabicweka 25 ahari 100.

Ogu kandi hoona ayongyeire yaahabura ngu ekizibu eki nikibaasa kurwanisibwa kurabira omukutunguura ahaku eminyeto mito erikwanguhirwa kutunga amakuru g’eby’amagara hamwe n’okutaho ehururu ezirikuhwera kubamanyisa ahabuheereza ahandengo zoona oteiremu n’omumyanya y’amaramizo.

Uganda erimu abantu bato baingi munonga kandi okurugiirira ahakucondooza omumubaro gw’abantu abanya Uganda barikuhisya ebicweka 49 ahari 100 bakiri ahansi y’emyaka 15. Dr. Beyagira ayorekire okukwatwaho kuhango ahabaishiki bato kutwara enda agumize ngu nikureetaho okunyangarara omumagara g’abaishiki abarikutwara enda omubiri gwabo gutakakwetebeekanisiize.

#WestUpdates