Aba Fish Protection Unit bayosya ebitimba bya biriyooni 1 ahanyanja ya Mwitanzige...(Photo by Thomas Tumwebaze)

N’ebya Thomas Tumwebaze

Kagadi:

Abajubi aha myaro 7 eri aha Nyanja ya Mwitanzige bayoreka okushaasha bwanyima y’ekitongore ekya Fish Protection Unit bakwataniise n’abeebembezi ba disiturikiti ya Kagadi bebembeirwe RDC okwosya ebitimba hamwe n’ebikwato ebindi birikubarirwamu biriyooni 1.5.

Omukoro gw’okwosya ebitimba ebi gwakorerwa aha mwaro gwa Kamina omugomborora eya Ndaiga omu disiturikiti ya Kagadi.

Aba Fish Protection Unit bayosya ebitimba bya biriyooni 1 ahanyanja ya Mwitanzige...(Photo by Thomas Tumwebaze)

Omubikwato ebyayokyibwa harimu ebitimba bya kokota na monofilament, amato, endobo hamwe n’ebindi byoona birikubarirwamu biriyooni 1.5.

Lillian Ruteraho, RDC wa disiturikiti ya Kagadi naagira ngu eki kikozirwe okwenda kuhezaho okujuba kubi aha Nyanja za Gavumenti.

Ruteraho naagira ngu ebitimba ebi bishorozibwe omukaire k’emyezi 5 yonka kandi ngu eki nikiza kuhwera abanya Uganda okutunga eby’enyanja ebikuzire.

Bo abajubi abagambaho na TV West kandi bakama b’ebikwato ebyayokyibwa nibashaba Gavumenti kubaha looni y’okugura ebitimba ebirikwikirizibwa babaase kwebaisaho.

Lillian Ruteraho, RDC wa disiturikiti ya Kagadi....(Photo by Thomas Tumwebaze)

Aba nibagira ngu bakaterwa amaizi bwanyima y’enyanja kwijura, baterwa COVID 19 kandi ngu hati bariyo nibaronda okubarabeho.

Francis Gwazo Xavier, orikukurira eby’obujubi omu disiturikiti ya Kagadi naagira ngu abajubi boona bakashomesebwa aha miringo y’okujuba eri ahamutindo kandi babaire nibamanya ngu ehururu egi ebaire eriyo neza kukorwa.

Gwazo nagira ngu ekitimba ekirikwikirizibwa omu Nyanja nikitekwa kuba kiri ekya inch 4.

Lt. Musa Shaban, orikudumira amahe agarikurinda enyanja ya Mwitanzige omu disiturikiti ya Ntoroko hamwe na Kagadi naagira ngu tibarikuza kuruha okukwata ebitimba ebitarikwikirizibwa kandi ngu nibaza kugumizamu okuhika obu abajubi barakore ebi Gavumenti erikwenda.

“Abantu abarikurenga 2,000 nibo bakwasirwe kwiha ehururu egi etandika aha Nyanja ya Mwitazige kandi abantu 43 bakatwarwa omu kooti kandi abandi batwarwa omu kihome,” Lt. Musa Shaban.

Enyanja ya Mwitanzige omu disiturikiti ya Kagadi eine emyaro 7 erimu Kamina, Kitebere, Senjojo, Nguse hamwe n’ezindi.

#WestUpdates