Munyamahurire 
Abaana 40 bariire obutwa bw’embeba omuri South Africa babwesire switi.
N’ebya Omushaki weitu
SOUTH AFRICA- Abaana barikurenga omuri 40 bairukangiziibwe omu eirwariro omu eihanga erya South Africa bwanyima y’okurya obutwa bw’embeba babwesiremu za switi.
Ab’obushoborozi omu by’amagara omu kyanga ekya Gauteng naagira ngu bwanyima y’okukyeberwa, abaana 17 bahairwe ebitanda kubaasa kureebuzibwa abashaho n’okuragurirwa kandi abandi bantu 24 basibwirwe bagaruka omu maka gaabo bwanyima y’abashaho kureeba ngu embeera yaabo terikwerarikiriza.
Hoona nabwo, guruupu y’abantu 10 abarimu abaana 8 boheereziibwe omu marwariro gatari gamwe omu kyanga ekyo kuragurirwa.
Ab’obushoborozi omu by’amagara nibagira ngu ebikorwa by’abantu okurya eby’okurya ebirimu obutwa byeyongiire kandi abantu 863 nibo bahandikirwe kuba bariire eby’okurya ebirimu obutwa kuruga omu kwezi kwa 10, 2023.
Nibahabura abazaire n’abakuza b’abaana okuba abegyendesereza aha kurinda abaana baabo.
#WestUpdates
