Kenneth Akanduhuura naajunaanwa okutooroboza omukozi w’omuka w’emyaka 15 akamutweka enda na bwanyima akamwihisamu enda.

N’ebya Charles Etukuri

BUSHENYI- Ekitongore kya Pooriisi ekirikucondooza aha mishango ekya CID kikwatsire owabaire ayetsimbireho ahabwa MP omu disiturikiti ya Bushenyi akwateirwe okutooroboza omukozi we w’omuka.

Kenneth Akanduhuura naajunaanwa okutooroboza omukozi w’omuka (house girl) w’emyaka 15 akamutweka enda na bwanyima akamwihisamu enda.

Nyakuteekateekwaho akwatsirwe bwanyima y’emboozi y’omwishiki ogu kushohorera aha TV West ahi abanyabuzaare b’omwishiki bagizire ngu nyakuteekateekwaho akatooroboza omwishiki omuri Bushenyi, yamutweka yaija yamwihisamu n’enda nikwo kumusigaho ekirugiiriremu omwishiki ogu kutandika kujunda ebicweka bye by’ekihama.

Aharwakana ebiro 18/04/2024, minisita w’eihanga ow’enshonga z’eminyeeto n’abaana, Balaam Barugahara aragiire orikukurira ekitongore ekya CID, Maj. Tom Magambo kukwata Akanduhuura owabaire ayetsimbireho ahantebe y’omuny’ishengyero wa Bushenyi-Ishaka Munisiparite.

“Yebare Magambo hamwe na tiimu yaawe ahabw’okukwata Akanduhuura orikugambwa kuba yaatooroboize omwishiki w’emyaka 15 omuri Bushenyi kandi akamuhwera kwihamu enda na bwanyima akamunagaho. Haine kubaho oburinganiza kandi tushemeriire kukwatanisa hamwe tukarwanisa ebikorwa nk’ebyo n’okushweza abaana bakiri bato,” Barugahara arikushoborora.

Omushango gw’okutooroboza gwigwirweho n’okuhwera omwishiki kwihamu enda gwigwirwe ahari Akanduhuura aha namba 23/12/04/2024 aha Pooriisi ya Bushenyi aha biro 12/04/2024.

Okurugiirira aha mwishiki, nyakuteekateekwaho naagambwa kuba yamugyemeseriize kwigura orwigi rwekishengye ahi yamushangire akabyama nawe omu kikorwa ky’omubonano obwo arikumukwata aha munwa ngu atateera enduru kandi akamutinisiriza obutagira ou yagambira.

Omwishiki akatandika kugira obuzibu bwanyima y’okwihamu enda kandi akagyemesereziibwa kutandika kukoresa za Pampa kandi nyakuteekateekwaho nagambwa kuba yayangire kuhwera aba famire y’omwana ogwo.

#WestUpdates