Abantu 6 bateirwe amashanyarazi baafa barikuteebekanisa omukoro gw'okugaitwa- Mubende.

N’ebya Omushaki weitu

MUBENDE

Abantu 6 bateirwe amashanyarazi bafeeraho obu babaire bariyo nibateebekanisiza obugyenyi bw’okugaitwa omu disiturikiti eya Mubende.

Ekikorwa ky’obusaasi eki kibaireho shaaha nka 3 z’akasheeshe k’orwakana ebiro 06.06.2024 obu abashaija 6 babaire bapangisiibwe omugore omushaija omanyirwe nka Otamugaya Nelson kwija bakamuteeraho tenti y’obugyenyi bwe bw’okugaitwa omu kyaro ekya Butawata E omu muruka ogwa Kigando omu disiturikiti ya Mubende.

Nikigambwa ng ku babaire bakiriize tenti, ebyoma byayo byakooza ahari kebo (cable) y’amashanyarazi nikwo amashanyarazi kubateera bakafa.

Rachael Kawala, Omugambirizi wa Pooriisi ahabw’ekyanga ekya Wamala naagamba abafiire nka; Godwin Asaba Bidewa, 40, Byamukama Boaz, 51 Ayebazibwe Jordan, 22, Walusimbi George, 19, Kakuru Ambrose, 30 na Nasasira Innocent, 32.

Kawala naagira ngu eki kiretsirweho obutafayo n'okukoresa obwira burengire.

Nayongyeraho ngu tiimu ya Pooriisi eyebembiirwe omuduumizi wa Pooriisi ahabwa Mubende, abakuru kuruga omu kampuni y’amashanyarazi eya Uganda Electricity Distribution Company Ltd (UEDCL) barahukire kuhika aha mwanya ahi abantu aba bateereirwe amashanyarazi.

Omugambirizi wa Pooriisi naagira ngu omugore omushaija Otamugaya Nelson, owabaireho omushomesa wa Kigando Seed secondary School airukangiziibwe omu eirwariro erihango erya Mubende kutunga okuragurirwa bwanyima y’okugwa kihuumura ahabw’ekikorwa ekibaireho.

Omukoro gw’okugaitwa gushaziibwemu ahabw’ekibaireho ahi abantu 6 bafiire.

Kawala naagira ngu okucondooza kuriyo nikugyenda omu maisho kandi emitumbi y’abagyenzi etwirwe omu kabafu ah’eirwariro erya Mubende kukyeberwa.

#WestUpdates