Abantu 5 b’eka emwe babokiize omunju baafa ahabw'enshonga z'amataka – Kyegegwa

N’ebya Philip Murangira

Abatuura okuruga omukyaro kya Kiremba omugombora ya Ruyonza omu disiturikiti ya Kyegegwa bagwereirwe akagwe bwanyima y'abantu abatakamanyirwe gye kuhemba omuriro ahanju y'omutuura mutaahi waabo abantu bataano bakahendera bafiire.

Eka egi etweire eine emihondano y’eitaka n’abarirwana eririkwingana hiika 54.

Abafiire barimu omushaija n'omukazi we hamwe n’abaijukuru baabo bashatu.

Aba bamanywa nka Kabatangare Paul w'emyaka 70, Busingye Bonny Agnes ow'emyaka 60 ogyerizeho kuhunga omuriro kwonka bakamutema amaraka, Mujuni, 6, Rwekaza Emmanuel, 13 hamwe na Kakama w'emyaka 7. Abandi babiri batweirwe omw’eirwariro rya Mubende bari omumbeera mbi.

Bamwe ahabafiire bwanyima y'enju yaabo kuhembwamu omuriro

Benard Akesiima mutabani w’abagyenzi ohoonire naawe kwitwa naagira ngu babataahiriire omubwiire bwa shaaha 7 z’ekiro.

Naume Musinguzi muhara w’abagyenzi naagira ngu batweire baine omushango gw’eitaka kumara emyaka 12 ngu kandi kubakomire abu babaire nibatongana naabo omu kooti ya Kyegegwa nikwo abanyabuzaare baabo kwija bakabataahirira.

Abanyabuzaare b’abagyenzi hamwe n’abatuura nibongyera baagira ngu omushango ogu gukazamu enguzi nyingi gwaturaho kuhwa.

Ab’eby'okwerinda bebembeirwe RDC Monica Karungi hamwe na DPC wa Kyegegwa, Godfrey Ninsiima bajumiriire ekikorwa eki.

Abantu 5 ahari 11 abarikuteekateekwa baheerize kukwatwa kandi abakiburize amaisho barimu mukuru w'entebe y'okubanza n’eyakabiri hamwe na Kansara

Pooriisi ehamiize abatuura n’abanyabuzaare ngu abainazi aba nibaza kukorwaho nk’oku ebiragiro birikugamba.

#WestUpdates
#RadioWestAt25