Disiturikiti ya Rubanda etongoize ehururu y’okugaruzaho ebisharara ebyataahiriirwe. Photos by Job Namanya.

N’ebya Job Namanya

RUBANDA

Ab’obushoborozi omu disiturikiti eya Rubanda batongoizeho ehururu y’okugaruzaho ebisharara byona ebyacwekyereziibwe omu disiturikiti. 

Ehururu egi etandikiire omu kisharara kya Karukara-Kanyambugo omu gomborora eya Muko ahi ab’obushoborozi bakwataniise n’abatuura kukuura ebihingwa n’okutema emiti ebibaire bibyirwe omu kisharara eki.

Abatuura b'omugomborora eya Muko omu disiturikiti eya Rubanda barikukuura ebihingwa ebi abantu baahingire omu bisharara.

Jane Amumpaire, Orikukurira eby’obuhangwa omu disiturikiti eya Rubanda naagira ngu okushomesa abantu aha mugasho gw’okugaruzaho ebisharara ebyataahiriirwe kutwire nikugyenda omu maisho.

Ahamisiririize eky’abantu kwehayo bakashagika ab’obushoborozi omuhururu egi ey’okugaruzaho eby’obuhangwa.

Disiturikiti ya Rubanda etongoize ehururu y’okugaruzaho ebisharara ebyataahiriirwe.

Amumpaire akyorekire ngu obucweka 95 ahari 100 bw’ebisharara ebiri omu disiturikiti ya Rubanda nibyo byaherize kutaahirirwa arikukyoreka ngu hariho ekyetengo ky’okutaho emiringo y’okubigaruzaho ahon’aho.

Eric Ssewandigi, Omuhwezi wa RDC wa Rubanda obaire akuriire ehururu egi agizire ngu bariyo nibata omunkora ekiragiro kya Purezidenti eky’okuragira abeebembezi kureeba ngu bagaruzaho ebisharara byona ebi abantu baataahiriire. Arabwire abatuura obutaremesa ehururu egi.

Omushaija kuruga omu gomborora eya Muko omu disiturikiti ya Rubanda arishara omuti ogwabiirwe omu kisharara kya Karukara_Kanyambugo omuhururu y'okugaruzaho ebisharara byona ebyataahiriirwe.

N’obu abantu abamwe basiimire abeebembezi ahabw’okureeta ehururu egi, abamwe borekire okukwatwaho kandi bashabire ngu baheebwe obwire burikumara beteebekanise kuruga omu myanya egyo.

#WestUpdates