Okurugiirira ahari Enanga, okutambura kw’ekiro n’okukyera omu itumbi kuzibiirwe.

N’ebya Simon Masaba

Poorisi bahamiize abarikuramagira Namugongo ku baine obuteeka omuby’okwerinda. 

Omugambirizi wa Poorisi Fred Enanga naagira ngu abaramagi abarikuruga omumahanga agatwehinguririize nka Democratic Republic of Congo, Kenya, Tanzania, Rwanda, Burundi na South Sudan n’omumadisiturikiti g’omu ihanga batandikire engyendo zaabo kugarura busya okwikiriza kwabo omukukuza ekiro ky’abaafeereire ediini. 

Ogu naagira ngu abaduumizi omubyanga bitari bimwe na bimwe baragiirwe kureebeka ngu abaramagi aba batunga obuteeka n’oburinzi

Aba baine kushendekyereza abaramagi kandi bakabarinda ahamyanya ei barikuba bahuumuriireho erimu amaramizo, amashomero hamwe n’emyanya ei abatuura omubyanga barikweteeraniramu. 

Okurugiirira ahari Enanga, okutambura kw’ekiro n’okukyera omu itumbi kuzibiirwe.

Omugambirizi wa Pooriisi, Fred Enanga omu rukiiko rw'abanyamakuru aha kitebe kikuru kya Pooriisi omuri Naguru, Kampala. Photo by Mpalanyi Ssentongo.

Abaramagi nibahaburwa kuguma omubikoosi byabo, batungye emwenda erikubaha obutagatsi, batambure n’endangamuntu zaabo amasimu, enshaho ezitaremeire hamwe n’emyenda erikurahuka kureebwa omumwirima,” Enanga nikwo yaagira obu yaaba nagaaniiraho n’abanya makuru ahakitebe kikuru ekya poorisi omuri Naguru omururembo Kampala eriizooba ebiro 20.05.2024

Kandi n’ekindi, okurugiirira ahari Enanga, aba bashemereire kureebeka ngu baine entambura nainga sente z’entambura y’okubagarurayo. 

“Ab’obushoboorozi nabo nibahigwa kureebuuza bakamanya abo abatarikubaasa kugumira orugyendo, na munonga ba kirinju, kwenda ngu babahe obuheereza b’eby’amagara oburikwetaagisa,” nikwo Enanga yaagira.

Haabaho embeera erikwetaagisa kukorwaho aho n’aho, abaramagi nibabaasa kukoresa emotoka za poorisi ezirikutwara abarwaire omumarwariro eziri ahanguuto nyeigyendwa, okurugiira ahari Enanga. 

Obwa hati, obuheereza obw’okushendekyereza n’okurinda abaramagi bwahairwe abaramagi abarikuruga Kenya hamwe n’omubicweka bimwe eby’oburugwa-izooba bw’eihanga.

“Abaramagi 724 kuruga omu itware erya Nebbi, abaasimbwire ebiro 15.05.2024, barikusiiburwa ishe-abariisa Raphael Pi Mony Wikorach, nibateekateekwa kumara ebiro 12 omurugyendo kuhika Namugongo barikurabira Aswa, Albertine, Savannah n’ebicweka bimwe ebya Kampala,” Enanga nikwo yaagira. 

Ebiro 18.05.2024, abaramagi kuruga omu itware erya Lango bakasimbura kandi obwa hati baayambukire orutindo rwa Karuma barinzirwe poorisi y’ekyanga ekya Mwitanzigye kandi hoona erikuza kubashendekyereza kuza Savannah mpaka Kampala. 

Ebiro 19.05.2024, abaramagi kuruga Congo (DRC), Rwanda, Kisoro na Rubanda bakaakiirwa ahakelezia ya Nyakatugunda omu tauni kanso ya Rubanda. Aba nibeeyongyera okushendekyerezibwa poorisihamwe n’ab’eby’ahanguuto barikuramaga kuza Namugongo. 

Poorisi nibamanya ngu abaramagi bari omurugyendo rwabo rw’okuza omururembo Kampala hamwe na Namugongo kandi nibabashaba okuzoora amaisho kandi bakegyendesereza baaba nibaraba omururembo n’ebiiruka byarwo. 

“Abaramagi nibaraburwa kwerinda enkozi z’ebibi n’abashuma abagyendereire kubaibaho amasimu hamwe n’ebindi bintu eby’obuguzi,” Enanga nikwo yaagira. 

Yaagira ngu Poorisi neeyendeza boona orugyendo rurungi rw’okuza Namugongo omumwaka gwa 2024 obwo barikuramaga kuza kugarura busya okwiriza kwabo hamwe n’obujunaanizibwa bw’enyikiriza zaabo. Poorisi yayongyera yaasiima ediini y’abakaturiki ahabw’okutaho engyendererwa n’ebiragiro ebirikurinda abaramagi ahanguuto. 

Amasimu g’okuteeraho omubwire bw’ekigwererezi

Ku haakugira ekyabaho ekrikwetaagisa obuhwezi bw’ab’eby’okwerinda, abaramagi nibabaasa kuhikiirira National Operations Command Centre ahakitebe kikuru ekya poorisi aha namba z’esimu, 0776 999 136, 0707 600 773, ninga esimu etari y’okushashurira eya 0800 199 699. 

#WestUpdates