Munyamahurire 
Enjura eitsire abaana 2, yahutaaza n’abandi omuri Mpigi.
N’ebya Simon Ssekidde
MPIGI
Abaana babiri bafiire n’abandi batuura 28 baatunga obuhuta bwanyima y’enjura y’amaani kugwa omu byaro 6 omu disiturikiti eya Mpigi.
Enjura egi etandikire shaaha 8 z’ekiro aharwakana ebiro 08/04/2024 ebaire eyijwiremu omuyaga kandi ecwekyeriize amaju g’abantu, ebihingwa. Ebyaro ebikirizeyo kuteganisibwa n’ekya Bukemba A, B, Kitakyusa, Wattuba, Njeru na Njeru B byona eby’omu gomborora ya Kituntu.
Abagyenzi bamanyirwe nka; George Mayumba, 8 hamwe na Kisakye Ndagire, 9, bombi abeegi b’eishomero erya Njeru Primary School.
Okurugiirira aha batuura, abaana babiri aba babaire nibatuura na nyine-nkuru bo, Pauline Nanfuka, omutuura w’omu kyaro kya Njeru.
Muriraanwa ogambireho n’omunyamakuru weitu naagira ngu enju ya Nanfuka etwirwe omuyaga ahari shaaha nka 10:30 z’ekiro kandi ngu nikiteeberezibwa kuba abaana aba babaire bagwejegiire nikwo kubandamirwa ebikoote.
Okufa kwabo kwizireho kumanywa baariraanwa ababaire baizire kubareebaho bwanyima y’okureeba enju yaabo egwire. Nyine-nkuru bo ashangirwe akwateirwe omu bikoote.
Okurugiirira ahari ceeyamaani w’egomborora eya Kituntu, Godfrey Nalima, enjura egi egarukire yacwekyereza amaju g’abandi bantu kandi abatuura kuruga omu maka garikurenga 200 nibo bateganisiibwe.
"Nitushaba gavumenti kwija ekatuhwera, ahabw’okuba amaka maingi gasigaire gatiine h’okwegyeka orubaju n’emisiri yaabo yoona ecwekyereziibwe,” Nalima arikushoborora.
Tubaasize kwihayo abantu 28 abu tushangire baine obuhuta bwanyima y’okubandamirirwa amaka gaabo kandi batwirwe omu marwariro gatari gamwe kubaasa kuragurirwa.
Okurugiirira aha mugambirizi wa Pooriisi y’ekyanga ekya Katonga, Karim Majid- emitumbi y’abagyenzi etwirwe omu kabafu ah’eirwariro erya Gomba kukyeberwa kandi neija kuheebwa abanyabuzaare kugiziika.
#WestUpdates
