Purezidenti William Ruto aine Gen. Francis Omondi Ogolla, mukuru w'amahe ga Kenya ofeeriire omuri butandu. Courtesy Photo.

N’ebya Charles Etukuri

KENYA- Purezidenti wa Kenya, William Ruto aharwakana ebiro 18/04/2024 arangiriire ngu eihanga niryija kumara ebiro 3 ririkwinamira abaserukare abafeeriire omunyonyi. 

Okwinamira abantu aba nikutandika eriizooba Orwakataano ebiro 19/04/2024. 

Abafeeriire omunyonyi barimu; mukuru w’amahe ga Kenya, Gen. Francis Omondi Ogolla hamwe n’abandi bantu 8.

Ruto nabwo aragiire ngu ebendeera ya Kenya ehanikwe ekicweka omu eihanga ryoona hamwe n’aha bitebe bikuru bya Kenya omu mahanga gatari gamwe.

“Ahari shaaha nka 8:20 z’omu eihangwe, eihanga ricuramiriirwe bwanyima y’enyonyi y’amahe kutunga butandu omuri Elgeyo Marakwet. Nyine okushaasha kwingi karangiirira okufa kwa Gen. Francis Omondi Ogolla- mukuru w’amahe ga Kenya. Abaire aine abaserukare 11 omu nyonyi kandi 9 ahari aba bafiire reero babiri bahonokaho,” Ruto arikurangiriira okufa kw’abantu aba.

Omu bandi abafiire barimu; Brig. Swaleh Saidi, Col Duncan Keitany, Lt. Col. David Sawe, Maj. George Benson Magondu (obaire navuga enyonyi egi), Capt. Sorah Mohamed, Capt. Hillary Litali, Senior Sergeant John Kinywa Mureithi, Sgt Cliffonce Omondi hamwe na Sgt. Rose Nyawira.

Purezidenti Ruto nabwo aragiire tiimu y’abacondooza okukora ekirikubasika kureeba ngu bacondooza ahari butandu egi ereteire eihanga ryoona ryacuramirirwa.

#WestUpdates