Omuny'ishengyero-kazi wa disiturikiti ya Mitooma arikuhayo paayipu z'amaizi ezi gavumenti ehaire abantu ba Mitooma. PHOTOs by Bruno Mugizi.

N’ebya Bruno Mugizi

MITOOMA

Abatuura b’omu muruka gwa Bukongoro omu tauni kanso ya Mutara omu disiturikiti eya Mitooma baine akamwenyo aha matama bwanyima y’okutunga paayipu z’amaizi zirikwingana kiromita 3.5 omu kicweka kyabo.

Za paayipu ezi zaakiirwe abatuura, ba Kansara, ab’ekitongore ky’amaizi ekya National Water and Sewerage Corporation aha mbuga nkuru z’eirwariro erya Bukongoro omu tauni kanso ya Mutara nyomwebazyo Orwamukaaga.

Abatuura nibagira ngu batwire nibashaba ekitongore ky’amaizi okubaheereza paayipu z’amaizi kumara obwire buringwa kandi hati okushaba kwabo kurugireho kwahikirira.

Andrew Karamuzi, manegya w’ekitongore ky’amaizi ekya National Water omu disiturikiti eya Mitooma asiimire gavumenti ahabw’okuheereza ebicweka byona ebya Mitooma paayipu z’amaizi.

Arikuhayo paayipu z’amaizi ezi, Juliet Agasha Bashiisha, Omuny’ishengyero-kazi wa disiturikiti eya Mitooma agizire ngu gavumenti eyehiireyo kuguma neshagika abantu ba Mitooma kureeba ngu batunga obuheereza burungi.

Aha mukoro nigwo gumwe, Omuny’ishengyero w’eishaza erya Ruhinda South omuri Mitooma, Capt. Dononzio Kahonda ashabire abeebembezi ahandengo zoona okukorera hamwe ahabw’entunguuka ya disiturikiti egi.

#WestUpdates