Minisita w’enshonga za Karamoja, Goretti Kitutu ari omu kooti...File photo.

N’ebya Omushaki weitu

KAMPALA

Kooti erikurwanisa obushomankuzi omuri Kololo yataho ekiro ky’ebiro 19/09/2023 nk’ekiro ky’okuhurira okushaba kwa minisita w’enshonga za Karamoja, Goretti Kitutu orikujunanwa omu nshonga y’amabaati kandi naagira ngu akatwarizibwa kubi kandi yaazibirwa kureeba ba puriida be.

Kitutu nabwo omuny’ishengyero-kazi wa disiturikiti eya Manafwa najunaanwa omushango gw’okubuzabuza amabaati g’abantu ba Karamoja we na munyanya Micheal Kitutu Naboya hamwe n’omuhwezi we omu by’obutegyeki, Joshua Abaho.

Eriizooba, Kooti erikurwanisa obushomankuzi eyaaba ekuriirwe Omuramuzi Jane Kajuga yaagira ngu ebirarugye omu kuhurira okushaba kwa minisita okw’okuribatirira obugabe bwe nikwo kurasharemu aha kiine kukorwa omu mushango gw’amabaati.

Kajuga yaragira ngu okuhurira okushaba kwa Kitutu okw’okuribatirira obugabe be kubeho Orwakabiri wiiki erikwija kandi omushango ogw’amabaati nigwija kuhurirwa ebiro 10/11/2023.

Omu kwetomboita kwe, Minisita Kitutu naagira ngu bakamushangira aha maisho bamuvuga siipidi y’amaani barikumutwara omuri Kayunga bwanyima y’okukwatwa kwe.

Kitutu naagira ngu akakwatwa ebiro 14/04/2023, yatinisirizibwa oteireho n’okumuzibira kureeba ba puriida be eki arikugira ngu kukaba kuri okuribatirira obugabe bwe.

Minisita Kitutu nayenda kooti erikurwanisa obushomankuzi omuri Kololo eshazemu kandi ebingye omushango ogu.

#WestUpdates