Omusinga wa Rwenzururu ari na bamwe omubakungu kuruga omukitongore ekiine obushoboorozi ahamizabi omu ihanga ekya National Drug Authority. PHOTO: FATUMAH NAGUDI.

Nagudi Fatumah, KASESE

Nk'omuringo gumwe gw’okutunguura enkoresa y'eby'emibazi y'ekiiraguju omukyanga kya Rwenzururu, ab'ekitongore ky'eby'emibazi ekya National Drug Authority (NDA) batayayeire Omusinga wa Rwenzururu, Charles Wesley Mumbere.

Okutaayaaya oku kubeire ahari 3 Wise Men’s Star School, eririkushangwa omu disiturikiti ya Kasese kandi ekitongore kya National Drug Authority (NDA) kijwekyeirwe Kalungi Fred Kabuye na Dr Jeane Muhindo. Aba bagambeire Omusinga ngu bagyendereire kuhisya abantu obuheereza obwine akakwate n'emibazi kandi ngu eki kyaza kuhikiirira baine kushugaana n'abebembezi b’Obusinga kubaasa kuhika ahabantu boona.

Aba National Drug Authority, Dr. Jeane Muhindo n Kalungi Fred Kabuye (ahagati) bari n'Omusinga wa Rwenzururu Charles Wesley Mumbere na ba Minisita be. PHOTO: FATUMAH NAGUDI

Aba hoona nibagira ngu enkoragana egi eya NDA n’obwebembezi bwa Rwenzururu yaaba eteirwe omunkora neeza kuhweraho kihango ahabantu b’omukyanga eki aha kutunguura emibazi y'ekiiraguju obwo barikurabira omukwegyesibwa kubaasa kwongyeraho omutindo, eki barikugira ngu, nikyoroba n’okutwara omubazi ogu omumahanga g'aheeru gwaba gukozirwe omumiringo etari emwe nk'ey'esaano.

Kabuye hoona nagira ngu tikirikuza kukoma aha mibazi y'ekiraguju yonka, kureka n’okurinda amagara g'abantu ahakubahwera okwerinda okukoresa emibazi efiire.

Omusinga wa Rwenzuruuru Charles Wesley Mumbere omukugamba kwe, asiimire ab'ekitongore kya NDA ahabw'okurugayo bakateekateeka aha mibazi y'eby'obuhangwa agumize ngu bakatandika ira okukoresa ebishaka, kandi ngu hati ku byakwongyerwaho omutindo nikiija kuhwera munonga abatuura.

Ogu kandi ayongyeire yaahamya ku ayeteekateekire kukwatanisa na NDA okureebeka ngu omukago ogu gwaza omumaisho. 

#WestUpdates