Kananura Martin na Dickson Baryahabwe...(Photo by Ssengendo Abdukarim

Okwetegurira Ekinihiiro kya Radio West

N’ebya Ssengendo Abdukarim

Dayirekita Wa Rwenjeru Agro-Tourism Demonstration and Training Farm, Martin Kananura yaheereza Radio West enumi kagaanga y’okubaaga aha mukoro gw’okujaguza amazaarwa g’emyaka 24 kwiiha etandika.

Kananura yakwatsa bakuru ba Radio West enumi egi omu faamu ye erikushangwa omu kyaaro kya Rwenjeru omuri Mbarara City North Division.

Kananura Martin arikuha Dickson Baryahabwe ente..(Photo by Abdukarim Ssengendo)

Kananura yaagira ngu ekimuhayiririze kurugayo kushagika Radio west erikujaguza amazaarwa gaayo n’ahabw’ebirungi ebi etwiire nekorera abanya Uganda omuri, okutaho puroguraamu ezirikwombeka n’okubegyesa okubarikubaasa kwetunguura kuruga omu bwooro.

Kananura yashaba abantu kwongyera kushagika Radio West agumize ngu niyo Radio yoonka eyine puroguraamu eziine ebigyendererwa by’okubayamba kwetunguura.

Kananura Martin Dayirekita Wa Rwenjeru Agro-Tourism Demonstration and Training Farm...(Photo by Ssengendo Abdukarim)

Orwamukaaga rwa wiiki egi, Radio west eine omukoro rugogoma ogurikuza kuba omu kishaayi Kakyeka erikujaguza emyaka 24 kwiiha etandikwaho ogutwetsire Ekinihiiro SABA SABA.

Dickson Baryahabwe, Station Manager wa Radio West yaasiima Kananura ahabwa rukundo ei ainiire Radio west kubakwatiraho omu kujaguza oku.

Baryahabwe yaahaamiza abantu ngu enteekateeka yoona yakozirwe kushemeza abantu boona kandi yaagira ngu bateebeekaniise ente nyamwingi ezibarikuza kubaagira abantu, ogisireho n’ebindi bintu byingi by’okubashemeza omuri abeashongozi abamaani abarabakyamure.

#WestUpdates
#Ekinihiiro SABA SABA