Abeegi b'amashomero omuri Mbarara barikworeka ebipande ebiriho obutumwa bw'okurinda entuuha. PHOTO: Eli Akiza

Omubaro gw’ekinyonyi ky’entuuha nigweyongyera kukyendeera – ab’eby’obuhangwa.

N’ebya Eli Akiza
Omubaro gw’ekinyonyi ky’entuuha nigweyongyera kukyendeera omu ihanga kandi eki kyerarikiriize ab’eby’obuhangwa ngu byagumizamu biti ekinyonyi eki kibaasa kuhweraho kimwe.

Vanice Mirembe, Manegya Human Wildlife Conflict omu UWA arikugamba ahamukoro. PHOTO: Eli Akiza

Okucondooza okukozirwe abatebeekaniise omukoro ogu, aba International Crane Foundation hamwe na Endangered Wildlife, nikworeka ngu omubaro gw’entuuha gukyendeire n’ebicweka 80 ahari 100 omu myaka 30 ehingwire.

Okucondooza oku hoona nabwo nikwongyera kworeka ngu okukyendeera kw’entuuha nikuruga aha kutaahirira ebisharara omu zirikuzaarira, okuziha obutwa, amahuri gaazo kuhumba n’ebindi bingi.

Bamwe ahabeegi b'amashomero g'omuri Mbarara bari ahamworeko gw'entuuha ahari Rwansinga P/S. PHOTO: Eli Akiza

Ebi n’ebindi bigambiirwe aha mukoro gw’okujaguza ekiro ky’entuuha okw’omurundi gwa 4 okurikumanya nka Crane Festival, ogukoreirwe omu disiturikiti ya Mbarara ah’eishomero rya Rwansinga Primary School.

Omubaro oguhereerukire nigworeka ngu obwa hati Uganda eyine entuuha zirikuhika 12,000 wagyera-gyeranisa na 30,000 emyaka 30 ehingwire.

Ba memba b'ebigombe ebirikurwanirira obugabe bw'entuuha barikworeka emizaano n'ebikwato byabo ahamukoro. PHOTO: Eli Akiza

International Crane Foundation hamwe na Endangered Wildlife, bakwataniise n’ekitongore ky’eby’enyamaishwa ekya Uganda Wildlife Authority bashabire abantu okurekyer’aho okwita entuuha.

Okutaahirira eby’obuhangwa nk’ebisharara ah'entuuha ezi zirikuzaarira, okuziha obutwa, emihingire mibi hamwe n’ebindi bingi nibyo bikizire kugambwaho aha mukoro ogu.

RDC wa disiturikiti ya Mbarara arikushoma obutumwa bwa Minisita Tom Butime ahamukoro. PHOTO: Eli Akiza

Omu butumwa bwa Minisita Tom Butime, obumushomeirwe RDC wa Disiturikiti ya Mbarara, Emmy Kateera Turyabagyenyi, ekitongore ky’eby’oburambuzi obwa hati bateire amaani omu kuta ebiragiro omu nkora okurwanisa ebihagaro by’okwita enyamaishwa, okuhiiga, enjuba mbi hamwe n’ebindi bingi.

#WestUpdates