Omubiri gwa Edson Nuwamanya, obaire ari Chief Warden wa Lake Mburo National Park, gurikushabirwa ahakanisa ya All Saints Mbarara eriizooba. PHOTO: Eli Akiza

N'ebya Eli Akiza
Omubiri gw’obeire ari mukuru w’eirindiro ry’enyamaishwa erya Lake Mburo National Park, Edson Nuwamanya, gwashabirwa erizooba ahakanisa ya All Saints Church omururembo Mbarara.

Abaana b'omugyenzi Edson Nuwamanya barikuta ekimuri ahashanduuko omumushabira aha All Saints, Mbarara. PHOTO: Eli Akiza

Edson Nuwamanya afeeriire omu irwariro erikuru erya Mbarara Regional Referral Hospital ahi abeire yaamara ebiro 3 aha kitanda.

Ogu yagambwaho nk’omuntu obeire naakunda omurimo gwe, omwesigwa kandi enkuzi ya baingi.

Abaana be hamwe n’omukazi we baamusiima ahabw’okubooreka omuhanda ogugororokire hamwe n’okubatebeekanisiza nyentsya nungi.

Bamwe ahabakozi ba Lake Mburo National Park bari ahakushabira omubiri gw'omugyenzi Edson obaire ari Chief Warden aha All Saints Mbarara eriizooba. PHOTO: Eli Akiza

Edson Nuwamanya, owaazairwe omu mwaka gwa 1971, yaasiga omukazi omwe n’abaana 3 b’abaishiki. Ogu akashomera omu mashomero nka Mbarara High School hamwe na Ntare ahi yarugire arikuza Makerere University. Na bwanyima yaaza Moi University omu ihanga rya Kenya.

Akakoraho nk’omurinzi mukuru omuri Murchison Falls NP, yaakuriraho purojrkiti y’okurwanisa okwita enjojo omuri Kenya kumara emyaka erengire 10.

Lavynah Marule Mbambu, omuhwezi wa mukuru w'erindiro ry'enyamaishwa ahakushabira omubiri gw'omugyenzi Edson aha All Saints Church Mbarara. PHOTO: Eli Akiza

Yaabaho mukuru wa Kibale National Park, yaakuriraho eby’okumaraho emihondano y’enyamaishwa n’abantu omu kitongore kya Uganda Wildlife Authority kandi hati afiire ari mukuru wa Lake Mburo Conservation Area aha mya 53 y’obukuru.

#WestUpdates