Ekiro ky'abajurizi ba Uganda nikikuzibwa ahari Namugongo omu disiturikiti ya Wakiso buri biro 03 okwezi okwamukaaga kandi nikireeta ekimbuuro ky’abantu kuruga omunsi yoona. Photo by Fredrick Kiwanuka.

N’ebya Fredrick Kiwanuka

Bwanyima y’okutambura oburaingwa bwa kiromita zirikuhika 160, abaramagi barikuhika 100 kuruga omubureeberezi bwa Masindi Kitara (nyomwabazyo) babeire basigaizeyo akagyendo kagufu – kuza Matugga. 
 
Ekikoosi ekyaraire ahakanisa ya St. Peters omuri Kalule haihi n’etauni ya Bombo ekiro ky’Orwakabiri kandi eriizooba bashemereire kuribata omuri Namugongo harikuburayo ebiro 3 kuhika ahakiro ky’okwijuka abajurizi abaafeereire ediini. 

Rev. Can. Kugonza, omuhandiiki w’obureeberezi, oyebembeire ekikoosi eki, agizire ngu abaramagi barikurenga 100 abarugire omubureeberezi, bakatandikira ahakanisa ya St. Matthew Anglican Cathedral okutambura aharwakataano barikumanya ngu nibaija kumara ebiro 7 omumuhanda.
 

Kugonza agizire ngu ab’ekikoosi kye, omu baingi babeire nibatambura kuza Namugongo omurundi gw’okubanza, babeire bakiine amagara marungi, oyhireho bakye ababeire nibacumbagira ahabw’amaguru kuzimba. 

Kugonza beitu hoona ayetomboitsire ahabw’ebiiruka bingi munonga aharuguuto nyeigyendwa orwa Kampala-Gulu ahi agizire ngu nikibabeera ekizibu ku burikuhika omumwabazyo. 

Rev. Siira Irumba, omuhwezi w’omwahure w’ekanisa ya St. Matthew Cathedral, Masindi, kandi nawe ori ahakikoosi eki, agizire ngu ahi bugiire kuhikira Orwakabiri bakaba baamazire ebiro 4 kandi barikuhumuraho emirundi mingi bwanyima y’okutambura eshaaha 2 omu disiturikiti ya Nakasongola na Luwero

Ebi abaramagi bagambire

Moses Katurinde, 33, kuruga omumuruka gwa Ntooma kuruga omubusabadiikoni bwa Ikoba agizire ngu gubaire guri omurundi gwe kutambura kuza Namugongo. Ogu agizire ngu ekyetengo ky’amaani ky’okureebeka ngu ebizibu bye bya sente byashoboororwa nikyo kimureeteire yatambura. Kandi abeire naahurira akiine amaani kutambura mpaka ahamuheru
 
Florence Kwegondeza, 32, kuruga omukanisa ya Masindi All Saints, nawe agizire ngu gubaire guri omurundi gwe gw’okubanza kutambura orugyendo rurikurenga 180 kuza Namugongo. Ogu agizire ngu nayenda Ruhanga amuhanguhize aha bizinensi ye kandi abahangaaze omunsi egi we n’eka ye.  

Juliet Isingoma kuruga omukanisa kya Kimengo, omuruka gwa Biizi omubusabadiikoni bwa Masindi, nawe agizire ngu gubaire omurundi gwe kutambura kuza Namugongo ahabw’okuba abaire nayenda kuhamya okwikiriza n’obwesigye bwe omuri Ruhanga.
 

Ekiro ky’abajurizi ba Uganda

Eki nikikuzibwa ahari Namugongo omu disiturikiti ya Wakiso buri biro 03 okwezi okwamukaaga kandi nikireeta ekimbuuro ky’abantu kuruga omunsi yoona. 

Abajurizi ba Uganda n’ekikoosi ky’abantu 22 ab’abakristo na 23 ab’abakristaayo abaabeire bahindukire abaikiriza omuri Ruhanga omubyafaayo by’obugabe obwa Buganda, abayitsirwe ahagati y’ebiro 31.01.1885 n’ebiro 27.01.1887. Aba bakaitirwa ahakiragiro kya Mwanga II owaabeire ari Omugabe (Kabaka) wa Buganda obwire obwo.

Ekereziya ekabahindura “abahikiriire” omugwa 1920 kandi Paapa John Paul VI yaabahamya omubutongore omugwa 1964 ahari St. Peter’s Basilica omuri Roma