Omushomesa Robert Kakanyisa, 42, orikugambwa kuba yayisire omukundwa we.. Photos by Fred Turyakira.

N’ebya Fred Turyakira 

MBARARA

Kooti omuri Mbarara esindiikire aha rumanda omushomesa Robert Kakanyisa, 42, omu kihome ahabw’okuteekateekwaho kuba yayisire omukundwa we.

Arikureebukaho omu maisho g’omuramuzi, Andrew Kabombo aharw’okubanza, kooti ehuriire ngu Kakanyisa, omutuura w’omu kyaro kya Rushanje omu gomborora eya Bugamba omu disiturikiti eya Rwampara aha biro 08/03/02023 omu kyaro kya Rushanje akataho orukwe rw’okwita Komuhangi Christine.

Komuhangi Christine orikugambwa kuba yayitsirwe omukundwa we, Robert Kakanyisa omuri Bugamba omu disiturikiti eya Rwampara.

Komuhangi, 33, akaba ari omushomesa ah’eishomero erya Kitwe Secondary School omuri Ntungamo beitu akaba nakorera bizinesi ye omuri Rushanje kuhisya ahi yafeereire.

Omutonganirizi mukuru wa gavumenti, Gerald Oundo Oddini naagira ngu okucondooza omu mushango kukiriyo nikugyenda omu maisho kandi ashabire omushango kugwongyerwayo.

Angel Tushemereirwe, Purida wa nyakuteekateekwaho ashabire kooti okurinda obugabe bw’omuntu we kandi ngu nateekateeka ngu okucondooza omu nshonga kushemereire kuba kwahwire ahi nyakuteekateekwaho arareterwe omu kooti kusindikwa omu kooti enkuru.

Omuramuzi Kabombo tayikiriize nyakujunaanwa kugira ekiyagamba nk’oku omushango gwe guri ogw’amaani kandi niguhurirwa omu kooti enkuru yonka. Amusindikire aha rumanda kuhisya ebiro 16/01/2024 kwongyera kumushomera omushango.

#WestUpdates