Omutsigazi acweriirwe kukomwa ameezi 6 ahabw’okwiba esente za nyin’enkuru.

N’ebya Stephen Nuwagira.

IBANDA

Kooti y’eidaara ry’okubanza omuri Ibanda ecweriire omutsigazi w’emyaka 18 ekifubiro ky’okukomwa ameezi 6 omu kihome ahabw’okwiba esente za nyin’enkuru.

Danson Natumanya, omutuura w’omu kyaro ekya Rwahura omu woodi ya Kashangura omuri Kagongo Divijoni omu Munisiparite ya Ibanda asingisiibwe omushango gw’okwiba Shiringi 115,000 kuruga ahari nyin’enkuru, Olivia Kobwemi, 65, aha biro 14.10.2024.

Ku abaire nareebukaho omumaisho ga kooti ebaire ekuriirwe omuramuzi Esther Murungi aha biro 26.11.2024, omutsigazi ogu ashabire omuramuzi okumuheereza ekifubiro kiringaaniire.

Natumanya agambiire kooti ngu okwezi kumwe oku amazire aha rumanda omu kihome kya Nyabuhikye ayegarukiremu.

Omuramuzi aikiriize okushaba kwa Natumanya nikwo kumucwera okukomwa ameezi 6 omu kihome beitu aha kifubiro eki, nibeija kusharaho obwire obu amazire aha rumanda.

Eki nikimanyisa ngu Natumanya hati naija kukomwa ameezi 4 n’ebiro 27.

#WestUpdates