Disiturikiti ya Sheema kusirika abantu 200,000 omushwija gwa rukaka (Yellow Fever). Photo by Bruno Mugizi..

N’ebya Bruno Mugizi.

SHEEMA

Minisiture y’eby’amagara erizooba ebiro 02/04/2024 netandika ehururu y’okusirika endwara y’omushwija gwa rukaka (Yellow Fever) omuri za disiturikiti 53 ezirimu na Sheema n’ekigyendererwa ky’okurwanisa omushwija gwa rukaka omu Uganda.

Abantu abaine omwaka gumwe kuhika aha myaka 60 nibo barikwija kusirikwa omushwija gwa rukaka ahi dozi emwe erikubamara omu magara gaabo goona.

Omushwija gwa rukaka niguretera amaisho g’omuntu gaba aga kinekye oteireho n’okujwa eshagama kuruga omu bwina bw’omubiri nk’enyindo, omukanwa, amaisho n’ebindi.

Edridah Kebaraza, Orikukurira eby’amagara omu disiturikiti ya Sheema naagira ngu baheerize kutunga emibazi kandi bagyoheriize omu marwariro agahansi omu kwetegurira ehururu egi egyenderiire abantu 200,000 omu disiturikiti.

Naagira ngu ekitongore ky’eby’amagara ekya disiturikiti kishaziremu kukoresa ebiro 4 eby’okubanza kusirika abaana b’amashomero omuri Sheema kandi ngu amashomero gamanyisiibwe ahahururu egi ey’abantu boona.

"Abandi bantu nibeija kusirikwa omu biro 3 ebirikuhererukayo omu wiiki egi kandi nibeija kusirikirwa ahamarwariro, omu myanya endiijo etoorainwe omu byaro byabo nainga omu kutambura enju ahandiijo omu disiturikiti yoona”, Kebaraza arikushoborora.

Kebaraza naagira ngu abantu abari ahaiguru y’emyaka 60 nabari ahansi y’omwaka gumwe, abakazi b’enda n’abarikwonsya hamwe n’abantu abaine oburwaire tibarikwija kusirikwa.

Ebyo bikiri aho, Ssempa Muzafaru- omurambuzi w’amashomero omu disiturikiti ya Sheema arabwire abazaire okwerinda okuzibira abaana baabo kusirikwa arikugira ngu orakikore naija kujunaanwa.

#WestUpdates