PHOTO: Miriam Namutebi

N’ebya Nelson Kiva 

Ab’ekibiina ekirikutebeekanisa ebigyezo ekya Uganda National Examinations Board (UNEB) nibagira ngu ebicweka 91.8 ahari 100 by’abeegi barikuhika 786,981 abaashutamiire ebigyezo by’okuhendera ekibiina kya 7 omwaka ogwa 2024 bahikire kandi nibabaasa kuza omururengo orwa siniya. 

Obu yaaba naaha ebirugire omubigyezo by’ekyamushanju eby’omwaka 2024, omuhandiiki mukuru owa UNEB, Dan Odongo, yaagambira muka mukuru w’eihanga kandi ori Minisita w’eby’obwegyese n’emizaano, Hon Janet Museveni ngu omuri aba, abeegi barikuhika 84,000 bahinguriire omu idaara ry’okubanza. 

Omuhandiiki mukuru wa UNEB, Dan Odongo, arikwakiira ebirugire omubigyezo bya PLE 2024 kuruga owa Minisita w'eby'obwegyese n'emizaano, Hon. Janet Museveni

Ogu yayongyera yaagira ngu abeegi 397,589 bahinguriire omu idaara rya kabiri. Omu idaara rya kashatu harimu 165,284 kandi omu idaara rya kana harimu abeegi 75,556. Beitu 64,251 baiziire omururengo orwa U. 

Okurugiirira ahari Odongo, abeegi 797,444 kuruga omumashomero 14,883 bakeehandiikisa kushutamira ebigyezo ebi omugwa 2024 wagyera-gyeranisa n’abeegi 749,347 abaayehandikiise omugwa 2023. Yayongyera yaagira ngu abeegi barikurenga omu 10,000 tibarareebekireho kukora ebigyezo ebi. 

Ogu yayongyeraho ngu amashomero 524,025 (obucweka 65.7 ahari 100) kuruga omumashomero 11,451 gabaire gari amashomero ga “boona-bashome” kandi 273,419 (obucweka 34.3 ahari 100) bw’abeegi kuruga omumashomero 3,432 babaire batarikuruga omuamshomero ga Boona-bashome

#WestUpdates