Okurugiirira ahari Otafiire, tihaine muntu weena oshemereire kuguma akomirwe atarikuhozesibwa.

N’ebya Omushaki weitu

KOLOLO

Minisita w'enshonga z'omunda, Maj. Gen (rtd) Kahinda Otafiire ajumiriire ekya Col. Dr. Kizza Besigye, owayetsimbireho ahabwa Purezidenti emirundi 4 kuguma akomire arikugira ngu Besigye kuguma akomirwe kumara ameezi garengire omuri 8 kirengyeseriize.

Okurugiirira ahari Otafiire, tihaine muntu weena oshemereire kuguma akomirwe atarikuhozesibwa.

Otafiire agambire ebi aha mukoro gw'okwijuka Sam Kalega Njuba, owabaireho Purezidenti wa Uganda Law Society owafiire omu kwezi kwa 12, 2013.

Omukoro ogu gubaire aha ofiisi z'ekitongore ekya Uganda Law Society omuri Kololo aharwakana ebiro 18.09.2025.

“Amaziima gari ngu Besigye kuguma omu kihome kumara ameezi garengire 8 kirengire. Ni kintu ki ekyo eki Besigye yaakozire?. Itwe nk'abantu, nitureeba ngu Besigye tayine mushango. Ofiisi ya mukuru w'abahababi ba gavumenti (DPP) eshemereire kurgayo ekatushobororera ekiriho,". Otafiire arikushoborora.

Omukugamba ahanshonga egi, Omutongaanirizi wa gavumenti, Kiryowa Kiwanuka agizire ngu naija kugambaho na Loodi Meeya wa Kampala, Erias Lukwago, omwe ahari ba puriida ba Besigye aha bikwatiriine n'omushango ogu arikujunaanwa.

Besigye akakwatirwa omuri Kenya omu kwezi kwa 11, 2024 na mutaahi we, Hajj Obeid Lutale ahi barikugambwa kuba babaire bagiire kutongozaho ekitabo ky'omunyabiragiro wa Kenya, Martha Karua.

Besigye na Lutale nibajunaanwa n'omuserukare wa UPDF, Capt Denis Oola omushango gw'okureebya eihanga.

#WestUpdates