Nasasira Brillian owa Bubaare Kashari yazaara omwana w'omwishiki ahari shaaha 6 gw'ekiro ebiro 25.12.2023 ahari Mbarara Regional Referral Hospital. PHOTO: FRED TURYAKIRA

N’ebya Fred Turyakira

Orishaba Daphine kuruga Masha, Isingiro yazaara abarongo kandi n’omwe ahabakazi 12 abaazaara omukiro ekyabusheesha burikuba Noohiri omumyanya 2, Mayanja Memorial Hospital na Mbarara Regional Referral Hospital, omururembo Mbarara, ahi omushaki waitu yaataayayira ahakiro kikuru eky’eriizooba.

Orishaba owazaara abarongo (omwojo n’omwishiki), yaagira ngu eri ryaba riri eizaara rye rya kashatu kandi yazaara gye n’obu araabe yaaba naahurira ataine maani.

Orishaba Daphine owa Masha, Isingiro yaazaara abarongo aha Christmas. PHOTO: FRED TURYAKIRA

Omushaho Patience Naiga, orikwebembera ahi barikuzaarira ahirwariro erikuru erya Mbarara Regional Referral Hospital, yaagira ngu bazaire kurungi abaana 11 kandi abaana na ba nyina boona baine amagara marungi. 
Aboojo baaba bari 7 kandi abaishiki bari 4

Ainembabazi Anna kuruga Katete omumashuuma g’Orurembo Mbarara yaaba nazigaija omwojo, obwo barikumushemeza, ahari shaaha 6 zonyine kandi ogu yamweta Isirayili, arikumuhikaanisa haihi n’omugane gw’oku Ruhanga yacungwire aba Yudaaya kureetaho obusingye.

Anna Ainembabazi kuruga Katete, Mbarara City South yaazigaija omwojo. PHOTO: FRED TURYAKIRA

Nasasira Brillian kuruga omugomborora ya Bubaare omu disiturikiti ya Mbarara yazaara omwishiki ahari shaaha 6 gw’ekiro, nawe barikumushemeza.

Nasasira na Ainembabazi baatunga ebiconco kuruga omu irwariro ahabw’okuzaara abaana b’okubanza omubwire bwonyine obu Yesu yazaariirwemu

Ba maama aba baahimbisa obuheereza bw’eirwariro bagumize ngu hati bweyongyeire ahamutindo n’obu bamwe baraabe bohereziibwe aheeru kutunga obuheereza bw’ekyoma ekirikubamurika omunda.

Beitu hoona Halson Kagure, orikugambirira eirwariro eri, yaajumiirira ekikorwa ky’abashaho kwohereza abarwaire kutunga obuheereza omumarwariro agandi aheeru bagyendereire kutunga ahakasente aku amarwariro aga garikutunga. Halson yaagira ngu Mbarara Regional Referral Hospital baine obuheereza bwona kandi tibwokushashurira. 

Ogu kandi yayongyera yaagira ngu babeire baatungire okwetomboitwa okwo kwonka ngu eirwariro riine ebyoma ebirikumurika omunda oteireho n’obwoma oburikubaasa kutambuzibwa. 

Kurwanisa omuze mubi ogu, Kagure yaagira ngu, bateireho ekihandiiko ekirikureebuuza abashaho abarikwohereza abarwaire aheeru y’eirwariro ngu kandi abo nibaija kuheebwa ekibonerezo

#WestUpdates