Charlotte Kangume, owatungire butandu omu mwaka gwa 2018 bakamusharaho okuguru. PHOTO: Courtesy

N’ebya Omushaki waitu

Ahabiro 26/01/2018, Charlotte Kangume akatunga butandu obu yabaire naruga kushemererwa na banywani be.

Kangume naagira ngu emotoka yaabo ku yaaremeire omu kifuregye, omuntu akaija yagisindika n’amaani mingi nikwo kutomera ekishengye. 

Naagira ngu akaza kwimuka yayeshanga omu eirwariro kandi taragarukire kumanya ebyabaire nibigyenda omu maisho ahabw’obusaasi bwingi obu yabaire aine. 

Kangume naagira ngu omu kubanza, amaguru ge gakaba gari gye beitu na bwanyima, okuguru okumwe kukahinduka kwatandika kwiragura.

Abashaho bakashanga ngu haine omusi ogw’enyima y’okuju kwe ogwabaire gucwekire kandi eki kikaba nikimanyisa ngu eshagama ekaba etarikubaaasa kutambura kuhika omu kuguru kwe.

“Nkaba ntarikubaasa kwikiriza ebi abashaho ababaire nibangambira ahabw’okuba nigwo gwabaire guri omurundi gwangye gw’okubanza kuhurira ekigambo ekyo. 

Nkaza aha mikura ya yintaneti naronda ekigambo okusharaho omuntu okuguru (amputation) eki kyabaire nikimanyisa ahabw’okuba nigwo gwabaire guri omurundi gwangye gw’okubanza kukihurira. 

Obwo eki nabaire ninyenda kuhurira n’omuntu ararabire omu mbeera nk’egi beitu tihaine ou naabonire.

Beitu nkaba ntakiine ky’okukora ahabw’okuba okuguru kwangye kukaba kwaherize kuhinduka kurikwiragurira kimwe,” Kangume arikushoboorora.

Abashaho bakampeereza eshaaha 48 kusharamu eky’okukora baagaruka bampeereza ebipapura by’okwikiriza abashaho kunsharaho okuguru, eki nakozire.

Kangume naagira ngu nayijuka arikugwa ahansi emirundi mingi ahabw’okuba akaba nateekateeka ngu akiine okuguru kwe.

Ekirikweshaniriza nk’eki, aha biro 30/05/2021, Sonia Kyoshaba akatunga butandu ya piki piki obu yabaire nagaruka omu hostel bwanyima y’okuheza kushoma ahari Kyambogo University. 

Kyoshaba akairukangizibwa omu eirwariro erya Mulago obwo ari omu mbeera mbi. 

Aha niho abashaho bamugambiriire ngu amagara n’okusharwaho okuguru asharemu kimwe.

Kyoshaba naagira ngu taratekatekire munonga aha kumusharaho okuguru ahabw’okuba akaba ari omu busaasi bw’amaani kandi abashaho bakansharaho okuguru. 
 
#WestUpdates