CAF esiimire Purezidenti Museveni ahabw'okushagika eby’emizaano omuri Africa.

N'ebya Aloysius Byamukama

MOROCCO

Purezidenti Museveni ahairwe ekiconco kuruga owa Purezidenti w'ekigombe ekirikukurira omuzaano gw'omupiira gw'ebigyere omuri Africa ekya CAF, Dr Patrice Motsepe nk'omwe ahabeebembezi omu kyanga kya East Africa abakirizeyo okuhagira hamwe n'okuhwera omuzaano gw'omupiira kutunguuka.

Museveni ahairwe ekiconco eki aha mukoro gw'okusiima abakirizeyo kukora kurungi omu muzaano ogu ahabw'ekizinga kya Africa omwaka ogu.

Omukoro ogu gukoreirwe omu rurembo Rabat, Morocco omu kiro eky'abusheesha eriizooba.

Ekiconco eki ekirikumanywa nka CAF President’s Outstanding Achievement Award nikiheebwayo Purezidenti wa CAF, Dr Patrice Motsepe aha omuntu arikuba akirizeyo kuhwera omu kutunguura omuzaano kandi eky'omwaka ogu, kihairwe Museveni ahabw'okwebembera ehururu y'okushagika kutebeekanisa empaka za CHAN omu Uganda, Kenya na Tanzania, ezi Motsepe hamwe na CAF bagizire ngu zikaba ez'omutaano.

Purezidenti wa Kenya, William Ruto hamwe n'owa Tanzania, Samia Suluhu Hassan nabo bakwatsiibwe ekiconco nikyo kimwe.

#WestSports