Ekitongore eki kyamara emyaka 3 omubuheereza kandi hati bari omuhururu y'okwetooroora eihanga ryona barikwegaita ahabitongore ebiine obushoboorozi omu kurwaniririra obugabe bw'abantu. PHOTO by Andrew.

N'ebya Andrew Tushabe,

Mbarara City

Ekibiina ekirikushugaanisa ebibiina ebirikurwanirira obugabe bw'abantu omu ihanga ekya Civil Space Movement kyagiraho ekigaaniiro n'abanyamakuru kureebeka ngu haabaho okumanyisibwa okurukumara omubantu okukwatiraine n'obugabe bwabo.

Arikugambira ahakigaaniiro eki ekyaba aha Oxford Inn omururembo Mbarara, Julian Kihembo, orikuruga omuri kimwe ahabibiina ebirikurwaniririra obugabe bw'abakazi abarikutuura omubyaro ekya Rural Women Defenders Network, yaamanyisa ku abantu baingi barikuritiina kugamba ahabintu ebirikuribatiirira obugabe bwabo ekirikureetera omwanya gw'obugabe omu ihanga gwayongyera kukyendeera. 

Abantu abaingi tibarikumanya bugabe bwabo, Okurugiirira aha kitongore ekya Civil Space Movement.

Julian yayongyera yaagira ngu abamwe tibarikumanya ku baine obugabe nk'obw'okutandikaho ekibiina ky'eby'obutegyeki, kugamba ebintu ebirikubacumbatirira ninga kwesimba nk'ahantebe y'eby'obwebembezi.

Sharon Ndyamusiima, omunyabiragiro kandi omushugaanisa aharurengo rw'eihanga yaagira ngu nibo baine obujunaanizibwa kwegyesa abantu kumanya ebikwatiraine n'eby'obugabe bwabo, kutaho obukiiko omubyanga, oburikuhandiika enshonga ez'okucumbatirira obugabe bw'abantu kandi bakagambira Gavumenti n'ebitongore byayo kutaho ebiragiro ebirikurinda obugabe bw'abantu.

Abantu abaingi tibarikumanya bugabe bwabo, Okurugiirira aha kitongore ekya Civil Space Movement.

"Ahabw'enki ebitongore bimwe, na munonga ab'eby'okwerinda barikwihaho akaanya akasigaireho, ak'obugabe bw'abantu? Emwe ahamirimo yaitu nka Civil Space Movement n'okureetaho embeera erikureetera abantu baatuura na bataahi baabo, kubaasa kwerundaana kandi bakooreka ebibacuramiriire bataine orikubakwata aha mukono," Barnabas Tugumisiriize nikwo arikwongyeraho.

Ekitongore eki kyamara emyaka 3 omubuheereza kandi obwa hati bari omuhururu y'okwetooroora eihanga ryona barikwegaita ahabitongore ebiine obushoboorozi omu kurwaniririra obugabe bw'abantu.

"Nitwenda kushoboorora enshonga z'eby'obwerinzi omubantu n'ahamikutu ya za kanyabwengye, kukwata kandi tukahandiika ebikorwa ebirikuribatiirira obugabe bw'abantu kandi tukahwera abo abu obugabe bwabo buribatiriirwe kutunga amagara marungi hamwe n'oburingaaniza." nikwo Barnabas arikugira.

#WestUpdates
#RadioWestAt25