Ishe-abaramuzi, Alfonse Owiny-Dollo yashaba kuhabaho okusaasirwa ahagati y'eka ya Amin n'abantu ba Acholi...(Photo by Jesse Johnson James)

‘Abantu ba Acholi musaasire Idi Amin’ – Owiny-Dollo

N’ebya Omushaki Waitu

Kitgum:

Ishe-abaramuzi, Alfonse Owiny-Dollo Chigamoi yashaba kuhabaho okusaasirana ahagati y’oruganda rwa Idi Amin n’abantu ba Acholi ahabw’okwitwa lwa Aakibiishopu Janani Luwum, orikugambwa kuba yaitsirwe gavumenti ya Purezidenti Amin.

Owiny-Dollo ebi yabigamba eriizooba obu yaaba ari omugyenyi mukuru ahamukoro gw’okwijuka okwitwa kwa Aakibiishopu Janani Luwum ahari Wii-Gweng omugomborora ya Mucwini omu disiturikiti ya Kitgum.

Alfonse Owiny-Dollo arikugambaho n'abanyadiini omuri Lango na Acholi...(Photo by Jesse Johnson James)

 
Kurugiirira ahari Dollo, okubarukaho kwa COVID19 kukacumbagiza okusaasirwa okwabaire kwatandikireho bwanyima y’ab’oruganda rwa Kakwa kushaba okusaasirwa abanyadiini ahabw’ekikorwa ky’omwana waabo.

Ogu yashaba owabaireho biishopu w’obureeberezi bwa Kitgum, McLeod Baker Ochola n’abandi ba biishopu b’ebyanga ebya Lango na Acholi kuhwera omukugarukanisa oruganda rwa Kakwa n’abantu ba Acholi.

Aakibiishopu w’ekanisa ya Uganda, Dr. Stephen Kaziimba Mugalu yashaba gavumenti kurabira omu Minisiture y’eby’obwegyese kugaruzaho eitendekyero ry’abashomesa omuri Lira ahi Janani Luwum yashomeire obushomesa, kubaasa kumwijukiraho.

#WestUpdates