Abany’eishengyero abarikujunaanwa obushomankuzi kureebekaho omu kooti eriizooba

N’ebya Edward Anyoli

Abany’eishengyero babiri abarikujunaanwa obushomankuzi n’ab’okureebekaho omu kooti eriizooba, Orwokubanza, 17/6/2024.

Yusuf Mutembuli omuny’eishengyero owa Bunyole East, Paul Akamba owa Busiki East Constituency na Cissy Namujju, Omuny’eishengyero-kazi wa Lwengo bacwereirwe emishango y’obushomankuzi omu kooti erikurwanisa obushomankuzi ahabiro 12/6/2024.

Akamba aizire yaarekurwa aha bail ahabiro 14/6/2024 beitu bataahi be Mutembuli na Namujju beimirwe okwemererwa kooti eya Nakasero ebaire ekuriirwe Omuramuzi Joan Aciro ahabw’okubura abeema bahikiriire.

Kooti eikirize Akamba kurekurwa ahamutango gwa miriyooni 13 eziriho kandi abeema be abarimu Mariam Naigaga, Omuny’eishengyerokazi wa Namutumba na Henry Maurice Kibalya, Omuny’eishengyero wa Bugabula County South n’ab’okushashura miriyooni 100 buri omwe ezitariho.

Akamba ashabirwe kuhayo passport ye omu kooti.

Ba puriida abarimu Asuman Basalirwa na Herbert Kidiya aharwakashatu bamanyise kooti ngu nibaija kugarukamu bashabe bail. Omuramuzi ayongyeizeyo okuhurira omushango ogu Orwokubanza, 17/6/2024.

Nikigambwa ngu Mutembuli, Akamba na Namujju ahabiro 13/5/2024 ahari Hotel Africana omuri Kampala bakashaba Mariam Wangadya, orikukurira ekigombe ekya Uganda Human Rights Commission kubaha obucweka 20 ahari 100 ahambariirira yaabo eya 2024/2025, bagumize nibaija kushaba akakiiko ka paramenti ak’eby’embariirira kwongyera aha budget ya UHRC.

Mariam Wangadya akakoraho nk’omuhwezi wa Kariisho-riisho wa Gavumenti atakatoorainwe kwebembera ekigombe ekya Uganda Human Rights Commission.

Beitu hoona abashatu aba nibehakana emishango egi.

#WestUpdates