PHOTO: Fatuma Nagudi

N’ebya Fatuma Nagudi

Abavuugi b’ebiloore omururembo rwa Mbarara baakyera kuta emotoka zaabo aha ofiisi z’orurembo rwa Mbarara ahabw’okubaima za tenda; ezirikubaikiriza kweshorooreza omushoro nk’aba loore.

PHOTO: Fatuma Nagudi

Aba nibagira ngu ekirikubashaasha, ni Kanso kwanga kubaheereza tenda y’okwerundaanamu omushoro, kwonka ekagiheereza ondiijo muntu otaine na motoka.

Abavugi ba loore aba, abaaba beebembeirwe ceyamaani w’ekibiina kyabo ekirikubagaita ekya Truck Owners & Drivers Cooperative Society, Badru Ssemwogere, baakyera shaaha 12 z’akasheeshe batyo baata za loore zaabo aha ofiisi za Mbarara City South Division hamwe n’okukinga omuhanda omukwesharinga okw’obusingye.

PHOTO: Fatuma Nagudi

Ssemwogerere naagira ngu emirundi ei kanso eyizire nerangisa omurimu gw’okupakira n’okupakurura, tihaine obeire yabakirize ebihandiiko beitu hoona nikibatangaaza kureeba ngu baguhaire omuntu ou batarikumanya omu ba loore.

Aba hoona nabwo nibongyera bagira ngu bakanga kubaheereza tenda y’okurundaana omushoro gw’ebiloore byabo, baagiheereza ou barikugira ngu naarundaana omushoro gw’ab’ebigaari.

PHOTO: Fatuma Nagudi

Kandi ngu nabwo nibabashashuza omushoro gw’emiringo ebiri ogw’okupakira hamwe bagaruka bashora ahabw’okwemereza motoka zaabo ahanguuto z’orurembo.

Muhammad Byansi, kansara orikujwekyera omwanya ogu omushango gwona yaguta ahari ‘town clerk’ ou arikugira ngu ayangire kugaba tenda n’obu ey’okubanza baagisharizemu.

Ahabw’okukinga oruguuto, kyagyemesereza pooriisi eyaba eyebembeirwe Tibesigwa Swizin ow’emirimo ya poorisi ya Mbarara, kuhika ahamwanya ogu. Ogu yaagyezaho kugamba nabo beitu barema okurwigura, nikwo kutaho orukiiko orutaayikirizibwamu banyamakuru.

Beitu hoona, Jomo mugabi Meeya wa Mbarara City South yaija yashoboorora arikwikiriza ku abakama aha rurengo rwa kanso ey’ahaiguru enshonga za tenda y’ebiloore batazikwatsire gye, nikwo kwemereza boona abarikushorooza ngu barekyere aho kuhisya obu enshonga ezi ziraakorweho.

Jomo yayongyera yaagira ngu boona abarikushorooza omushoro hati baine kwemereza kuruga eriizooba, kandi ogu yagamba aha nshonga y’okubashashuza kabiri agumize ngu nibaza kugikoraho ahabw’okuba tikihikire.

Aba na bwanyima y’okugamba nabo, baikirizana baihaho loore zaabo.

#WestUpdates