Omukumi ateirwe amasasi omuri Biharwe, Mbarara yaafa.

N’ebya Omushaki weitu

MBARARA

Pooriisi omuri Mbarara City North Divijoni eriyo necondooza omushango gw’okuteera omukumi amasasi agamwitiireho omuri Biharwe. 

Omugyenzi amanyirwe nka Mwetiise Justus, orikukora na kampuni y’eby’okwerinda eya Sting Private Security Company kandi obaire nakuuma ahari Ankole Farmer’s SACCO, Biharwe.

Pooriisi omuri Biharwe emanyisiibwe aha nshonga egi nikwo kushanga omutumbi gw’omukumi omuntebe, embundu emuri omu kifuba ahakyombeko ekya Ankole Farmers SACCO ahi abaire nakuuma omuri Biharwe ahabiro 19.01.2025. 

Samson Kasasira, Omugambiirizi wa Pooriisi ahabw’ekyanga ekya Rwizi naagira ngu Pooriisi erahukire kuhika aha mwanya nikwo kwihaho omutumbi ekagutwara omu kabafu ah’eirwariro erihango erya Mbarara kukyeberwa.

Kasasira naagira ngu Nayebare Alex obaire nakora n’omugyenzi aha SACCO egyo aburize amaisho. Alex nawe nakora na kampuni y’eby’okwerinda eya Sting Security Company.

Ekirugiriireho okuteera amasasi omukumi ogu (Mwetise Justus) tikikamanyirwe kandi tihaine kintu kyona ekishangirwe kibuzire omu ofiisi za SACCO egi.

Kasasira naagira ngu bariyo nibahiga Nayebare kuhweraho Pooriisi omu kucondooza omu mushango gw’okwita Mwetise Justus.

#WestUpdates