Ab’eby’okwerinda babonire omutumbi gw’omuntu ondiijo omuri Lake Victoria.

N’ebya Omushaki weitu

Ab’eby’okwerinda abari aha muhiigo gw’okuronda emitumbi y’abantu abagwire omu Nyanja ya Victoria aha kutandika k’okwezi oku bwanyima y’eryato ryabo kugwamu babonire omutumbi gw’ondiijo omuntu aha bantu 2 abarikugambwa kuba babaire babuzire. 

Arikugambaho n’omunyamakuru weitu aharwakabiri, Omudumizi wa Pooriisi y’aha maizi, Bamunoba Ubaldo, naagira ngu omutumbi ogu baihireyo n’ogw’omushaija mukuru beitu takamanyirwe maziina. 

Beitu, Bamunoba naagira ngu omutumbi ogu gubaasa kuba guri ogwa Haruna Ssembatya orikugambwa kuba niwe mushaija wenka otwire obuzire aha bantu ababaire bari aharyato eri eryagwire omuri Lake Victoria.

“Omutumbi tugutwire ah’eirwariro erya Mulago ahi abanyabuzaare be barikwija kuza bakareeba yaaba n’omuntu waabo,” Ubaldo arikushoborora.

“Obwa hati turiyo nituronda omutumbi gwa Sharon Wasemba. Omuhiigo nigugumizamu obwo turikukwatanisa n’abajubi b’eby’enyanja hamwe n’abatuura abarikwija kutuhweraho kumubona,” Bamunoba arikwongyera kushoborora.

Bamunoba nabwo nashoborora ngu omubaro gw’abantu abafeereire omuri butandu y’eryato eri babaasa kukyendera kuza ahari 16 kurug ahari 20 abu twabandize kugamba kuba nibo bafeereire omuri butandu egi.

“Abantu 9 bakacungurwa, emitumbi y’abantu 15 niyo yaherize kwihwa omu maizi kandi omuntu omwe wenka niwe akibuzire ekirikworeka ngu eryato eri rikaba ririho abashabaazi 25 n’emigugu yaabo,” Ubaldo arikwongyera kushoborora. 

Butandu egi ekabaho ebiro 03/08/2023 obu eryato eryabaire ririho abashabaazi n’emigugu yaabo ryagwa omu Nyanja ya Victoria ririkuza aha mwaro ogwa Kasenyi. 

#WestUpdates