Ab’eby’okwerinda kuruga omu Uganda na Rwanda baabugana. Photos by Job Namanya.

N’ebya Job Namanya

KABALE

Abakuru kuruga omu bitongore by’okwerinda omu eihanga erya Uganda na Rwanda bari omu rukiiko rurikukwata ahansharo y’amahanga aga 2 kuruga eyigurwaho ebiro 31/01/2022. 

Bwanyima y’okwiguraho orukiiko oru, abanyamakuru tibaikiriziibwe kwetaba omu kiganiiro ky’abakuru aba.

Purezidenti wa Rwanda, Paul Kagame akaragiira ensharo ya Uganda na Rwanda kukingwa aha biro 27/02/2019 arikujunaana Uganda okukora emirimo y’obwambega omu eihanga rye, okukwata abanyarwanda n’okushagika abaheekyera.

Okukingaho ensharo egi kukarugiiriramu okuteera amasasi abanya-Uganda 5 ahabw’okugambwa kuba baabaire nibambusya ebintu omubuhenda biragiro. 

N’obu ensharo yayigwirweho, hakiriho okutiina ahi abashuubuzi barikworeka obutamarwa ahabw’ab’obushoboorozi omuri Rwanda kuzibira emishuuburo yaabo kutaaha omu eihanga eryo na munonga obuhunga.

Aha biro 17/01/2023, Jack Turyahikayo, orikumanywa munonga nka Rwakigizi, omushuubuzi kuruga omu disiturikiti eya Rukiga akateerwa amasasi ab’eby’okwerinda omuri Rwanda obu yabaire ari aha kashozi ka Nyakisa omu Uganda. 

Omu wiiki egi, abakuru kuruga omu eihanga erya Rwanda na Uganda abarimu; Yves Muneza hamwe n’abajwekyerwa kuruga omuri za disiturikiti eziri ahansharo omuri Kabale, Kisoro, Rubanda, Rukiga hamwe na Ntungamo, beerundaaneire aha White Horse Inn Kabale omu disiturikiti eya Kabale ahi bagizireho orukiiko rw’omutaano.

Ab’eby’okwerinda kuruga omu Uganda na Rwanda baabugana.

Omu rukiiko rwabo, Maj. Gen. Rtd. Robert Rusoke, ambasada wa Uganda omuri Rwanda agizire ngu orukiiko oru rubaire rugyendereire kushoboorora enshonga z’eby’okwerinda ezirikuteganisa abantu b’omu Uganda na Rwanda.

Naagira ngu bagambire aha kwongyera eby’obushuubuzi omu mahanga aga, okuhwera abantu kutambura bataine kuteganisibwa kwona, okurwanisa endwara hamwe n’okurwanisa okwambusya ebintu omubuhenda-biragiro omu mahanga aga 2.

Rusoke nakyoreka ngu ebicweirwemu omu rukiiko oru nibyija kwanjurirwa ba Purezidenti owa Uganda na Rwanda.

Bwanyima y’okwiguraho orukiiko oru, abanyamakuru tibaikiriziibwe kwetaba omu kiganiiro ky’abakuru aba.

#WestUpdates